ابتداءها الشاعر المرحوم  عقوب الشرمي وقال:
 

الجا ر عند جاره ضايعات احقوقه .. والخير واجد غيـر طايـر بوقـه
الـعـلـم فـيــه تــقــدم .. والخيـر واجـد والحيـا متهـدم
او رينا الشايب ع الصغير ايخـدم .. والعيل معا والديه ناصب سوقـه
ويقولـوا اللـي حمـال مايتنـدم .. ولكن طويل البـال ركبـوا فوقـه
الـوضــع تـمــا بـايــخ .. منه كبيـر النجـع ريتـه دايـخ
حتـى اعيالـه ماعليهـم شايـخ .. ان كان سد باب ايبينـوا ناتوقـه
وضــع مـــو عاجـبـنـي .. وريت المخرب غالب اللـي يبنـي
واللـي انريـد انريحـه يتعبنـي .. واللي حلو يبقى شين كيف انضوقه
 

فرد الشاعر عبد الكريم بو جديّده
 

وضــــــع مــحــيــر .. واخر زمـان وكـل شـي متغيـر
واللي انقول ف الزنقه عليه اديّـر .. كيف تقصده تلقاه خـارب سوقـه
وان الرخا صاحب عزيـز وخّيـر .. وهو امغير لون وبوهيه ملصوقـه
زمــــــان الـــهـــده .. زمان الحسد والغل واصـل حـده
وماعاد اهناك اللي ان جاتك شـده .. يدرّدب عليـك ورقبتـه مخنوقـه
واجد اللي يبارك ومو مـن جـده .. يعلـم الله بمـا حـوا صنـدوقـه
وتلقـا العالـم راكبـتـا شــده .. حتى العويّـل ضايقـات اخلوقـه
وتلقـا النـاس نفوسهـا منسـده .. مالي وفقـري وكلهـا محموقـه
وتحـق الضحكـة لاحقتـا غـده .. وتلقـا البهجـه فوقهـا رقروقـه
زمان الباطل فيـه واصـل حـده .. والحق صايـف ذابـلات اعروقـه
واللي تحمله حملاك خوف ايعـده .. يطمع طمع ويزيد نفـخ اشدوقـه
زمان والقرش فيه الوف كيف اتعده .. ونجيت تصرفا معزوق في شاروقه
ولاله سبب معلـوم نيـن اتحـده .. مع كل مطـرح تايقـات ابروقـه
واللي تنشده تلقـاه واصـل حـده .. ماعد عرفت اعطاب هالساحوقـه
طالب كريم وكل شـي فـي يـده .. وفجر الهنـا ياتـي الا بشروقـه
يمكن صفانا كـي زمـان ايـرده .. اياما العالم كـان ف اخـر روقـه
اياما وقسم الضيـف عنـد المـده .. ساق وسهم معلوق في مخروقـه