15/02/2008

تحليلات الحاج حمد !

زعمك أيش صار في المقرحي يا أولاد ؟؟ زعمك المركان والانجليز يبوا يطلقوه والا ماصارش ؟؟ ياودي ما زلنا ما فهمناش !؟ مره نسمعوا زغاريت وتصفيق ودرابيك, ومره نسمعوا بكاء وعياط وشياط ونديب !؟؟ دوختونا بهالخبارات إللي مره شكلهن توره ومره شكلهن مُوره !! الشفاعة يا رسول الله !! مره خلاص المقرحي يبوا يطلقوه ومره وراس الملكة ماهو طالع ؟ الحكاية باين عليها فيها (إن) وحتى ال (إن) هذي فيها حكاية !!؟؟ وخوذوا عندكم تحليلات عمكم الحاج حمد:

(1) يا إما المركان والانجليز كانوا يريدوا يطلقوا المقرحي على اساس أنه يكمل مدة العقوبة في بلاده وتحت ستار إتفاقية تبادل السجناء مقابل يعطيهم القدافي (حاجة زينه) وإلا (هبره كبيرة) وبعدين القايد غير رايه وسكر راسه وانقلب عليهم وبالتالي حتى هم انقلبوا عليه وقالوا مافيش مقراهي ولا شرب شاهي هيا إمشي العب بعيد وإلا تجيك طقره على راسك !!.

(2) ويا إما همه ضحكوا عليه وقالوله غير أنت إطلق البلغاريات وإحنـي بعدها طوالي على دربك طوالي نطلقوا المقراهي وبعدين وبعد ماطلق القايد البلغاريات قالوله الإنجليز والله (سوري, سوري يا خبيبي !) أسفين راهي سكوتلندا عنزت في الموضوع وتعيش وتاكل غيرها !

(3) يا إما النظام نفسه كان وراء هالأخبار والشائعات المفبركه بيش يبرد شوية علينا وعلى روحه من فجعتنا وصدمتنا بسبب فضيحة طلقة البلغاريات !! على أساس وحده بوحده وآهو المقرحي قريب يطلقوه !! آهو قريب... بكره... لا بعد بكره... الخميس الجاي لا الخميس الآخر... وكل خميس يقولوا لآخر وفرحتنا تمت تستاخر !.

(4) والإحتمال الرابع والأخير هو ... يا إما ...؟؟ وإلا هالإحتمال الأخير اللي مازال خلوني نشاور فيه الحاجة قبل !! وخلوني نشوف شنو رايها فيه بالزبط وبعدين نرد عليكم !! راهي عمتكم الحاجه حتى هي كيفي غير تسلم في السياسة !! طالعه لأمها أم الشناقيل الله يرحمها ويخفف عليها التراب الثقيل!! كانت وراء كل طاسة شاهي خضره تركني بتحليل إخباري !! وهيا تمسوا على خير وآنستم بعضكم ومبارك كبيرتكم !!؟

http://www.libya-al-mostakbal.com/News2008/Feb2008/140208_uk_almagrahi.html

الحاج حمد

* الصورة من كاريكاتير محمد الزواوي