09/10/2006

الصمت موش ديمه حكمه1

سعيد الجطلاوي

بيني وبين نفسي قررت (ماندويش) (1) طول اليوم ..لكن الغريبه أعدائي كثرو في هاليوم ...رقادة ريح حتى في السكوت؟؟
 

فرمـــان:
 

أصدرت فرمان بأن أصبح شاعرا ، توكلت على الله ومشيت لأكبر مكتبه في المدينه وشريت (عرم اوراق) (2) و(بيرو غالي) (3) ... وعقاب الليل نضت وضويت شمعه وفتحت (زهاز الراديو) (4) علي موسيقى هاديه .. (قعمزت) (5) قدامي الورقه و(البيرو) أنراجي بيش ايجيني وحي الشعر .. (هلبت) (6) ساعه ..أثنين.. والورقه كيف ما هي فاضيه ..هممم قلتي لنفسي: بالك وحي الشعر ايراجي ورا (الروشن) (7) .. حليت (الروشن) وتميت (انتمقل) (8) وانتلفت يسار يمين، بالك انحصلي شي خويط شعر طايح هنا ولاهناك.. ولكن خرف هنا عندك مالقيت شي ..الله غالب.
 

خش الصبح وخيكم ما خط فيها قاف و لا كاف .. صكرت الروشن وكتب عالورقه :
 

فرمــان:
 

(قررت الاعتزال من (زليز) (9) الشعر لعدم كفاية الموهبه) ومشيت للسرير بيش نرقد ونحلمللي بشي حلامه جديده وفرمان جديد.
 

في المحكمه
 

وهي في طريقها للمحكمه (أتخرف (10) في روحها):
 

والله لازم يطلقني و(كراعه) (11) فوق رقيبته .. ها لمشفش .. نلقاني ماني طايقته..افففففف خمس أسنين ونا انعاني فيه ،ماريت منه غير القهر والغصايص وعطاب (الزقار) (12) .. والله أساع نغرس ظوافري في وجهه ومانيش امحولتهن لين أيطلقني.
 

بعد أن خرجت من المحكمه تمت اتعزي في نفسها:
 

نلقانه تعبان.. جبان.. هكي بهالبساطه ايلقني..؟ شنو فيها كان غرست ظوافري العشره في وجهه ولا حتى رقبته .. لو كانهو راجل صحيح (راه) (13) غفرلي هالزله ؟
 

لو كانهو راجل صحيح راهو تحمل (سماطتي) (14) ؟ ..نلقانه نذل وصدق من قال: الرجاله ما لهمش آمان.
 

هضا جزاه
 

كان يخدم بصمت وهدوء .. يحسابوه راقد ..فطردوه..؟!
 

قراقوز
 

.. ماعادش يقلقني (أنصبي) (15) قدام (لمرايه) (16) وما (انحق) (17) شي ... ما عادش يأثر في نمشي بين الناس وما حد ايعدل علي .. نلقاني مبسوط بها المساحيق .. ونلقاني سمح بها ألاقنعه ... وما أجملني بها القراقوز هللي في داخلي...!!
 

سقوط
 

حزنت الطويرات لموت الصقر .. (لجنه) (18) كان ايطاردهن فيعلمهن فنون التحليق في السما. !!
 

سعيد الجطـــلاوي
getlawy@hotmail.info

(1) لا أتكلم
(2) مجموعة أوراق
(3) قلم
(4)جهاز
(5) جلست
(6) مرت
(7) النافذه
(8) أنظر وأتأمل
(9) بلاط
(10) تحاكي نفسها
(11) قدمه
(12) سوء الطالع
(13) كان
(14) ثقالة دمي
(15) اقف
(16) المرآة
(17) أنظر
(18) لأنه