دعاية أنتخابية بثروة الليبيين
للمرشح جديد - 5 والاخير- (المنطمر ينطق)
{وعفوا الحوار
باللغة البنغازية}
تحية
طيبة ... وعذراً لقول الحقيقية بشفافية...
إذا
كانت المعارضة الليبية وتحديداً هي كلمة تخص ليبيين بالخارج فقط أو هذا ما
أراده النظام الحاكم ... وأذ كان من حق من يحكمون البلاد أن يسلخوا عنهم
أنتمائهم لليبيا ..أي بمعنى لا انتماء لليبيا لمن عارض أو أصبح رجعي أو
زنديق.. أو من هم يستلمون هناك مرتباتهم بالدولار واليورو و كما يقول
النظام الحاكم … بديلاً للدينار الليبي المفيد للصحة والعافية ... وهكذا
يجب أن يحكم النظام بتشريع وقرارات فوقية شبه مؤلهة وربانية أي غير قابلة
للنقاش وأي نقاش وعلى الناس بأنهم ليسوا بليبيين بل كلمة لقطاء هي دستور
تلك التشريعات والقرارات والتي تسن عبثاً بالمؤتمرات الشعبية كما يحدث
...وكما حكمت قبائل ليبية على أبنائها بداخل الوطن وببوتقة تلك القبائل
بأنهم ليسوا من القبيلة الفلانية أو القبيلة العلانية ...
أذا
القرار الحكيم والقانون الصحيح بيد من يحكمون البلاد وليس بيد أي أحد اخر …
والتجربة والمنطق والواقع المر يقول ذلك, والسلطة الحاكمة هي وقبيلتها هم
من أعراق ونسل ليبي صحيح, والبقية الباقية فلا هم لقطاء .... وبل البقية
الباقية يجب أن تكون مجموعة الشعب للخدمة والهتاف والحماية و(البصاصة, او
الجوسسة) وتنفيذ التجربة الجماهيرية بمعامل التجارب الشعوبية و فقط ...أذا
كلمة معارضة هي تخص لبييين بالخارج فقط .. أما من يعارض بالداخل فليس من
المناسب أطلاق كلمة معارضة عليهم ..فالقاموس الوطني الليبي يقول لا يجوز
... ولتبقى كلمة معارضة صغيرة وصغيرة ولن تكبر .. وخاصة أذا مأخترقت هذه
المعارضة الليبية وجزئناها وأصبحت مجرد خمسة أشخاص لن يستيطيعوا عمل شيئ
... اذا زيد تحدى زيد .. فالنهضة بالبلاد هي هذه الدائرة وبس وستبقى هي
كذلك.
وهذا
هو الجزء الخامس من الحوار ... والذي قلنا انه الطليعة والسيرة والحكاية
التي تعيش بين المجتمع الليبي.
********
المنطمر: يهز برأسه يمينا يساراً.. ويساراً يميناً .. وكأنه يريد أن يقول
شيئاً ولكنه أحب الصمت كالعادة.
اجل المنطمر يؤثر الصمت على الكلام.. وقاعدته الذهنية وتربيته ربما
(الصمتوالسكوت من ذهب).. فهو لن يقوى على الكلام… لأنه ولد صامتا... ومنذ
كان رضيعاً ربما هو هكذا فلا يصرخ أبداً كالعويلة يا مضانيني... ومهما أحس
هذا المنطمر الطفل الصغير بالجوع أو الظلم الواقع عليه جراء قضاء حاجته
والبلل الجائرعليه.. ولم تنظفه أمه.. وتدهنه بالزيت الزيتون بعد ذلك لكي
يذهب الحرقان اللعين... أتعرفون الحرقان ؟ أم ممرتم على الدنيا بدونه ؟..
أنه عذاب مبين بالنسبة لطفل صغير رضيع … فالمنطمر لا يصرخ أبداً يا عليك
راجل طفل يا ناس … وربما حكمته أيضاً هذا المنطمر أن الرجال لا يصرخوا
كالنساء أبداً ... وعويل دائما صامت ... وبكاء الرجال الحق بالداخل فقط
.... الى أن تحين الموت والرحيل .. فالصراخ للنساء فقط .. ربما هذه حكمته
الاخرى ... والتي ربما يطبقها كل الناس من حوله وربما جل الليبييين الأن.
الشخيص: بلا ... غيـر قولي هال الكلام هضا منوين جبته ...؟ ومن وين تعلمته
بس ...؟
العبد
لله: جبته من حوشكم وحوش جيرانكم وجيران جيرانكم ... و جبته ما الواقع ...
ولو شفت أكويس راهو ألقيت الليبيين كلهم هكي .... نفس الكلام يا بو صاحب.
الشخيص: الليبيين كلهم ...مرحب ...مرحب !! ومن وين جبتها هال الإحصائية
أنشالله ؟
العبدلله: أحصائية ؟ وهوا انتم خليتوا فيها إحصائية يا شخيص !!... تي ...
التشريع في البلاد والإحصائية هي التزوير أمتاعكم ونقطة الضعف .. الغير
مسموح بيها ؟
الشخيص: وهذي كيف اتجي بالله عليك ؟
العبدلله: هذي أتجي ... لما حضرتك تكتب نعم ولا... لا ... بتصويت ولا
انتخاب ـــ
الشخيص: يا سلام تصويت ولا انتخاب .... مزال غير هذي بس ...تهذي تقليد أعمى
للغرب والدول الرجعية ... نحنا يا بابا مؤتمرات … وأمرهم شورى بينهم ولجان
شعبية تنفذ يا بابا ... والقران دستورنا يا بوها .... مش صناديق وضحك على
الشعوب ... وبعدين وريني قائد ... ولا زعيم واحد كيف القائد أمتاعنا … تهضا
والنبي ..خير للبلاد كلها …. لكن الليبيين ميشفوش في النعمة اللى هما فيها
... توا بعد هال الديمقراطية فيه ديمقراطية ... بالله يا ناس ؟ القائد
دارلكم مؤتمرات وميكروفونات عنقاري بيش أتقول رايكم وراي اللي جابوكم ...
وانتم لايعجبكم العجب ولا الصيام في رجب ... واو.
المنطمر: ينظر بوجه يكاد يكون كطرف ثلجه أمصقعة ... فلا تعرف منها تفاصيل
ابداً ...فلا تتحرك عيونه ولا ترتجف يا راجل أبداً ...
العبد
لله: يعني قصدك يا شخيص أن أصنيديق التصويت هو تقليد أعمى واللي جينا
طبعاًَ ونستورده … من خارج ليبيا هو رجعي وغير حضاري .. والدول اللي عندها
انتخابات هي دول مش مزبوطة ورجعية ومتخلفة !! تمام ميه .. ميه..
خلاص
يبقى توكل على الله وسيب السيارة أمتاعك والسروال والقرواطة .. والنظام
المصارفي ولا البنوك ... وسيب المكارونة الايطالية الفاشية حتى هيا ...
والدوا أمتاع الشلل الرعاش ... وحبوب المنشطات بيش تقعد صقر ديما ... وحفرو
لنا الطرق وخلوها بيستات, وهدموا واحرقوا ... المطارات والطيارات …
وخلوها... محطات خيم للجمال والأبل… (تعالوا تعالوا للجمل الأبيض السريع
بخمسة كيلو تمر بس لعند سلوق يا أباتاه …) وهدموا العمارات ...وكسروا
القزاز ... وسكروا محطات البنزينة .. وخلوا التراب راكح ... ومطلعوش النفط
... وسكروا التلفزيونات والميكروفونات أمتاع سلاطة الشعب أمتاعكم ... وطوحو
الموبيلات فالبحر … وأعفسوا على الصحرا الكبرى يا ...أبا تاه ... لأن كلها
تقليد أعمى للغرب ... يعني أنجيبوا كل حاجة ما الغرب اللعين والدول الرجعية
إلا صنيديق الانتخاب هضا .. هو بس اللي رجعي وغير حضاري … لا خلاص.. خلاص
.. شكلاطة (الكيت كات).. يبقى خلوها شورنا وشور أعيالنا بس يا بو جاب الله
.. و يا بوها .. وخلونا أنشلغفوها نحنا بس .. لأننا رجعية وأعيال كلب !!!
وانتم يا تقدميين أعفسوا شور الصحرا ودار فور... وأقعدوا بالتمر والسحلب
غادي .. غادي ... غاديكا .. بالله … وزغرتوا غادي .. وزيد تحدى زيد... غادي
.. يا أباتاه ... وخلونا نحنا أنديروا أنتخابات وتصويتات ودساتير وقوانين
لأننا نحنا جد أصل الرجعية والعمالة .... مش قلتوا (الصحرا مانتبتش فيها
البذرة .. لكن تنبت فيها الأخلاق والمبادي) .. خلاص يا أمتاعين الأخلاق
والمبادئ والقيم والحضارة ... وحفلات ايطاليا واليونان .... دونكم هال
الصحرا اللي فيها الأخلاق والمبادئ – وعدو ... تي عدوا الـ .... عال الصحرا
مع رسولكم رسولكم رسول الصحرا ... توا مش قلتكم القائد رسول الصحرا ! خلاص
سيبونا ..ودونكم الصحرا ... البحر مالح عليكم يا أمتاعين الأخلاق والمبادئ
ــــ
المنطمر: يضحك ولكن …
الشخيص: تغير كانك أتعوج فالدوه يا خويا ….تبرم في برمات قوية راهو … توا
شن دخل القرواطة والسيارة والموبايل … في صناديق الإنتخابات ؟ أه .. وانت
رايح أتقول كيف سيدي مسعود الحسان ( الحلاق ) اللي زمان ... وهو دايرلي
روحة حلاق بدعة وهو طري ــ … وهو أينهش في روسنا وشعيراتنا ونحنا أفروخ
أصغار .. تي تنهيش روسنا … كنك رايح أتخلط في الكلام تخليط … أه
العبدلله: مولينكس يا أباتاه …. من حالة الرجعية والكلاب ضالية … هضا تخليط
... الخلاط المولينكس أصلي موش مقلد يا أبا تاه .
المنطمر: بصوت أجشش .. لكن ..... لكن ــــــــ
العبد
لله: أص .. تي أسسسسسسس يا شخيص ...المعجزة ...تحققت ...المعجزة اللي
أنراجوا فيها... أهياه ...
المنطمر: يبتسم وكذلك الشخيص .... اذ يقول المنطمر : لكن نشهد بالله أنك
أمزنح واجد يا شخيص ... وين يا بوها هال التخلف على وذنه ... توا يعني تبي
أتقوللنا أن عمتك المؤتمرات هي نهاية الفيلم أمتاعنا ولا شنو ؟ يعني قصدك
يا شخيص أ، هال المؤتمرات هي الشورى أمتاع دينا الإسلامي .. وهي أكبر كذبة
في الدنيا علينا ... توا معش فيه حتى أشوية حشم عندكم ولا شنو ...؟ ...
أسمع يا شخيص يا ولد خالي ... والله والله .. إلا هذي حيلة كبيرة بيش ما
ايسيرش هال الانتخابات اللي يحكي عليها العبدلله ... تي بلاش ... تي من
اللي قاللكم أطبقوا نظرية (يا أترومي يا نكسر قرنك) ... يعني يا ليبيين خشو
لهل المؤتمرات وهدرزوا على السياحة في ليبيا والرز والطماطم بس .. لكن حجات
أخرى لا ... لأ .. لأ ... واتقولي ديمقراطية ... تي هذي سرقة لحقوق
الناس... الناس اللي خليتوهم مايجـ ين... في ابلادهم ومهمش ناس ... خزية
عال الناس اللي ما تحسش ... خزية مية مرة على الناس اللي ماتت فيها حاجة
أسماها المرارة .. خزية على سايرهم الحرقان ... وهما أمنعجين ... ما أتقولش
إلا حيط هش ... خزية عليكم وعلى المبادئ اللي تعرفوها أنتم يا كمشة سراـــ
... يا كمشة لمد ـــ
الشخيص: لا لا ... أنتم كمشة رجعية وزنادقة .. وحرام أيتكلم الواحد أمعاكم
... بلا حتى أنت يا المنطمر زنحة .. وعلمك هال المزنح التزنيح ... لا ...
لا أقعدوا فيها ... ما تبيلكم إلا تأهيل في شي أصلاحية ولا سجن ... أنتم
جراثيم تبي مبيدات قوية... أنتم أفات وخطر على المجتمع .. أقعدوا فيها
......
العبدلله: غير أرجى يا شخيص .. تي أرجى ... دونك يا المنطمر ... دونك ياوجه
الثلجه .. دونك الراجل عدا راهو تي غير شن دواك أنت ... مش كنت منطمر يا سي
الهـ .... تغير شن نطقك بس ... دونك دونك .. جيبه راهو أيكر فينا الحبل ...
وخلينا ذوايح ... توا خلاص ضاقت معش فيه حد ندوو أمعاه إلا هال بوبطن ...
دونك يا خويا يا المنطمر الراجل توارا راهو.
المنطمر: (بصوت اجش) تي تعال يا شخيص... (بصوت رخيم) ... يـــأ شخيص ....
يا شخيص ... تعال ... تعال يا راجل ... يا بوبطن يا شخيص راهو كانك عديت
تبقى عيل .. أه.
وذهب
الشخيص لمكان غير معلوم.
********
أنتهى
جزء الحوار 5 والأخير
بنغازي 17
حركة
العصيان المدني بليبيا
17
أبريل 2008
ملاحظة:
•
الشكر والتقدير لمن صاغ هذه الأجزاء وأعانني عليها.
•
الحوار القادم بأذن الله واذا الشخيص خلانا أحياء ... بعنوان (حليمة بنت
شارعنا).
مساهمات سابقة:
راجع:
|
