دعاية أنتخابية بثروة الليبيين
للمرشح جديد (4) (المعارضة الليبية)
أحدى الدعايات
بالقديم... وكأن شباب ليبيا لاهم لهم إلا الخنفسة والخنافس,
والتشجيع على
الزراعة فأين هي عمتي الزراعة اليوم في ليبيا ؟
{أعتذار شديد
اللهجة للفنان الزواوي.. وعفوا الحوار باللغة البنغازية}
تحية طيبة وعذراً لقول الحقيقية
بشفافية...
ويستمر الحوار بين (المنطمر)
الصامت, و(الشخيص), و(العبدلله) ...
حوار يكاد أن يكون السيرة اليومية للمواطن الليبي الذي أصبح يعاني
الوضع السيئ ببلاده ...
وعندما نقول سيئ فهذا التعبير يكاد لا يوازي الحالة الليبية ومواطنها ...
أي أن الحالة شديدة ملحة لأجل التغير ...
بل قد تشبعت حالة المواطن بالسؤ وكل السؤ وهو ينظر بعين حزينة لحالة وحال
بلاده ... وهذا الجزء (4) للنقاش والذي وضعنا له
رأس موضوع بعنوان المعارضة الليبية .. فماذا تعني
كلمة معارضة بمفهوم المواطن الليبي, وما هي ؟ وكيف هي ؟ :-
******
الشخيص: وتقولي معارضة ليبية ...
كمشة هاربين من البلاد ... لا وراهم لا قدامهم غير الكذب على القائد
وأفكاره ... كمشة (جلبيين)..
يبو أيجيبوا لجانب للبلاد .. وتعاود لبلاد
للأستعمار من جديد .. ونبقوا كيف دول واجده لا
سيادة لا علم ولا حرية غير كذب وخلاص.
المنطمر: يهز برأسه باهتمام بالغ
.... رافعا عيونه شاخصتاً مذهولة.
العبدلله: أسمع يا شخيص ...
الناس اللي بره هما ليبيين غصبن عنك ..
ومنظنيش حد طلعلهم قضية جنائية ... هذي واحد ....
أثنين لوكانهم كيف ما أتقول يبو أجيبو لجنبي للبلاد راهم من زمان وزمان ...
في البلاد وأشكالك راهم مرميين في السجون ... وثلاثة
.. من اللي قال أنهم عملاء للأجنبي (يا عليك
أسطوانة قديمة) .. العميل للأجنبي معروف منو ...
وبعدين لباس ... تبيهم أيقعمزوهم في بوسليم ويراجو في القائد بيش أديرلهم
أصبح الصبحو ... ولا العشية
... تي ماهو هي هيا يا شخيص يا صاحبي .. تي
ماهو الجماعة الليبيين اللي بره أسماهم رجعية والمعتقلين اللي جوه أسماهم
رجعية وزنادقة وعملاء .. واللي ايدورو في السجن
الكبير ليبيا أسماهم الخط ولوح ووكالين (الشكلاطة ..
ونفاخين البلالين ...) ... يبقى هي سوق ولا
شنو يا شخيص ... اللي يبي يشري يا هوه ...
أهواه شخشيير رجعي ميه ميه ... أهياه طاقية
عميلة ميه ميه بالبلاش يا بوها ... بكم (كداش) .. بالله السورية الأمبريالية
يا خويا ... هذي ...
بجنهين ونص بس .. يا بو صاحب .. يا بلاش ..
تعال أشري .. تعال أشري الموديل الجديد من
القراويط ... القروايط الموضة الجديدة يا ..
بو خال ... قراويط موديل (الجلبي) ...
تعالوا اشروا .. قرب قرب ...
قرب على (قراويط الجلبي) يا نزيك ... زيد
ابرم في السوق والله مانك لاقي كيفها يا ... تعال
تعال يا لعور أشري ...
(بصوت أجش مبحوح) تعال ..
تعال يا سي الهــ ... أشري كنادر الزنادقة ...
أخر طرحة يا بوجار ... أخر طرحة يا وجه
التيــ .... تي قتلك تعال أشري يا لجرب خيرلك كنادر نطاريات واتنطر ...
فنيلات العملاي يا با... أخر كلام يا حلو ...
أصلها فنيلات أوطنية مية ميه ... فنيلات
موديل الماركة العالمي الـ (العملاء) ... يعني يا
شخيص الإسطوانة هذي دوروا غيرها ... الناس من بره
أتعيط على حال البلاد عيني عينك ... وقسما بالله
العلي العظيم إلا تبيلهم أكبر تقدير واحترام ...
هابا لولاهم .. هابتين وهابة ... اللي يفضحوا في
النهار لزرق اللي ساير في البلاد ... وهذي أنقولها
لك لأنك صاحبي ... والبقية تعرفها يا شخيص ..
المنطمر: يهز برأسه مبتسماً ..
الشخيص: مبتساً أيضاً ...
لا لأ ... هذي المرة راك غالط يا عبيدالله
... هضوما ناس أعفسوا من البلاد لأن أبلادهم مش
عاجبتهم ... المفروض كانهم وطنيين صح ..
وليبيين مزبوط راهم أقعدوا في البلاد وبنوا أمعانا ...
مش حايسين فيها بزنس ومتريحين بره ... ومسيبين أبلادهم ..
بدل ما أبلادهم تستفيد من خبراتهم ... تي فيه اللي صرفت عليه ليبيا
وعلماته وبعدين هرب البره ... وقاعد حايس بين الدولار واليور...
العبدلله: لا ..
لأ .. أنت اللي أرجى ..
راك أمخلط الموضوع يا بو صاحب .. وانت رايح
أتقول عندك خلاط (مولينكس أمتاع الأسواق) ...
المنطمر: يبتسم وبصوت و بشكل خطير.
العبدلله: ....
صح فيه ناس أعفسو ما البلاد لا حس لاخبر ...
يعني اللي يمشو توا ويجوا .. يعني no
ملاحظات أمنية شورهم يا شخيص ... يعني جماعة (خطا راسي وقص ..
وشن دخلني يا بابا ... جماعة اللعب واقف يا
بابا وماما) ... واللي فيهم جواسيس للأمن الداخلي والبراني على خوتهم
الليبيين اللي كيفهم .... وسبحان الله يا شخيص
التاريخ يعيد نفسه ... زمان أيام الطليان ...
كانت ناس واجده لابدين وكارسين مع الصبايا والنسواين ...
والجهاد والمجاهدين راكبين فيها حواسي وشغل صح وجهاد ...
وفيه اللي ما الليبيين فتحلي دكان أسفنز..
أسفنز بالدحي فانتاستيكو ... وواحد اخر بزنس مع
اليهود ... (وعدي يا فرخ الربا) ... وواحد (بكلاوه
بقلب اللوز... وعسلية بالعسل ...
قرب .. قرب يا لحبيب)
.. والمجاهدين راكبين الخيل والحصنة وتغابير التراب وراهم دايرات
بزعاقة ... وقاطعهم الشر وراكبين في الطليان
ودايريلهم نهار أحرف و... على روسهم وروس اللي
جابوهم ... هضوما اللي تحكي عليهم هما اللي لابدين
توا ... بره لا حس لاخبر ..
الموضوع موش شورهم ... ليبيا عندهم أسم بس
... ومخلط بينهم وبين الناس الشريفة ... الناس
الصح .... تي ... أرحلو
وزادو فيـــــه ... ما البلاد... تي غصبن عنهم ..
والله غصبن عنهم باهي ... تي لا غصبن عنهم هذي
أشوية .. يعني صار في الناس هضوما نهارات سود
وتشنيق وقتل, ولا أبلادنا مصارش فيه تشنيق وقتل ..
على الطريقة الإيطالية يا شخيص ولعند توا ....؟ وأعفسوا ما البلاد ...
ونعرفوا ناس واجده منهم ... وأعيال ناس صح أشتغلوا حمالين في المواني
اللي بره ... يعني زرهم الزرار يا صاحبي ...
والزرار هوا اللي راكب لعند توا فينا ...
وأتقولي عملاء ... عملاء من ؟...
تي قتلك فيه اللي أهربو ... وفيه اللي أحصلوا وتمموا عليهم في مقبرة
سيدي أعبيد ولا الهواري ... ولا الهاني .. ولا رموهم في رأس الرجاء الصالح
... تعرف رأس الرجاء الصالح يا شخيص ولا لأ ..؟
ولا أقعدوا اللي أحصلوا جوا ... يرجوا عشرين عام لعند دارولهم (أصبح الصبحوا)..
وهضوما اللي سميتوهم عملاء وكلاب ضالة ...
تي والله .. أأتحشموا ...
على أوجوهكم خيرلكم يا شخيص ... ناس أتعيط
على حال البلاد لسود وأتقولـــــي عليهم عملاء ...
تي عيب ... والله عيب ..
وقلة حيا.
المنطمر: أيضاً ...
مشدوه العيون رافعا أياها بوجه الشخيص ربما بحقد وكره هذه المرة.
الشخيص: توا يعني ... أنت ادافع
عليهم ولا شنو ؟ .... أنت شن دخلك بيهم ...
لا فيهم خوك لا بوك ... وبعدين دولتنا أدرى
بيهم ...
العبدلله: دولتنا شنو ؟
الشخيص: أه ..
اهاه ... دولتنا وأجهزتها تعرف الغالط وين
والهارب من ...؟ (ضحكت بسري على الجملة الأخيرة ... دولة ..
قالك دولة ... وقد ذكرني كلام الشخيص ..
بعادل امام .. بمسرحية شاهد ماشفش حاجة ... وخاصة
الجزء .. هما ... أنتم مش الحكومة ..يعني بتعرفوا كل حاجة) ... وبعدين توا
أنت تعرف وين العميل ووين اللي مش عميل ... تهذي
أستخبارات يا بوها مش لعب ... تي عارفين أنت من
... وحتى رقم شخشيرك عارفين رقمه XL ولا M.. ولا
S. تي عارفين كل شي ... تي هضوما لوكان أمخليلهم
الباب مفتوح أشويه بس راهم زاقبين من زمان على أرقــــبتك يا عبودة ...
لكن ربي ساترها ... والجماعة فاطنين.
العبدلله: مش نافص إلا أيقولي
المعارضة الليبية (قراندايزر) خطير ... بلا عليك
حالة يا شخيص .. تي من اللي زاقب على رقابينا ...
تي لأ ... اللي أمدحنس رقابينا ؟ ...
تي هضوما الناس اللي أتقولي عليهم معارضة ..
والله.. والله لولاهم ... راهي الزقبة على
الرقابي راهي أكثر من توا ... تي باهي ..... تغير
قولي بس يا شخيص توا من اللي قال لعائلات الليبين أن راهو النظام يا ليبيين
قتل أكثر من الف شاب ليبي .. في أسويعة نهار ..
راهو الجريمة في بوسليم يا هوه يا ناس يا عائلات الضحايا ...
راهو الزمرة الحاكمة .. راهي أرتكبت جريمة
بعيالكم يا هوه ... من من الليبين ... المناكيب
اللي يندري على الناس اللي ماتت في جامعة بوسليم الحضارية ؟
بلكي تحسابهم الليبيين يلقوا الخبر في الزحف الأخضر يا شخيص ولا
بصحيفة الجماهيرية ولا جريدة الشمس البرتقالية ...
ولا عمتك صحيفة أويا ولا خالتك صحيفة قورينا ..... من اللي فضح الكوارث
والسرقة في البلاد وعرف وفهم الليبيين الدجال والكذاب والعميل والسراق
والمجرم من ؟؟؟؟ من اللي قاللنا راهو أعيال القائد يشروا بيختات بملايين
الدولارات وحايسيين في ثروتكم وانتم ذوايح راكم في أبلادكم ... لعند أعرفوا
الليبيين وكلهم أن النظام كذاب كبير .. خليني
أنقولك يا صاحبي (ليضحك الشخيص بإبتسامة خفيفة ..
وفرصة أخرى للمنطمر ليبتسم هو الاخر) .... من اللي
أثار قضية الإيدز وغيرها من القضايا ... مش
الليبيين اللي بره يا شخيص ... يعني اللي جوه (المعارضة والعملاء) قالوا
لخوتهم اللي كيفهم واللي بره ... هال الكواين
السود اللي سايرة جوه في البلاد ... والناس
الليبيين اللي بره قالت للعالم الحقيقة ليس إلأ ..
ولا مش حقيقية يا شخيص ؟ يا منكوب المناكيب ...
يعني المعارضة واحد مش أثنين .... تره فكني
ما الكلام الفارغ ... عرفنا توا من الليبي ومن
اللمد.
المنطمر: يهز برأسه يمينا يساراً
.. ويساراً يميناً ..
وكأنه يريد أن يقول شيئاً ولكنه أحب الصمت كالعادة.
الشخيص: بلا ...
غيـ
(ليكتمل ذلك بالجزء 5)
بنغازي 17
حركة العصيان المدني بليبيا
13 أبريل 2008
ملاحظات هامة:
• لماذا كلمة معارضة تخصص أي ليبي
بالخارج فقط .. هل الليبيين بداخل ليبيا الرافضين
للنظام وأستمراره وبشدة .. هل يمكننا أن نقول عنهم
معارضة أيضاً أم كلمة عملاء كبيرة على المعارضة بالداخل ..
أي تخصصهم فقط هو زنادقة وربما رجعية, ولكي ترضوا أنتم وترضى أيضاً
أمريكا الحرية ؟ أم النظام يريد أن يجزء المفهوم لكي يحقق مقولته الشهيرة (فرق
تسد) ؟.
• لماذا المعارضة الليبية ورجالها
الأحرار لا تنتبه لحالات كهذه للتفرقة, ولتجعل اللحمة الوطنية ووحداتها ضد
هؤلاء الفاشيون الجدد أمر مهم وهام للقضية الليبية ؟
• من يعول على من..؟ هل أهل الداخل
(المعارضة الداخلية) على الليبيين بالخارج, أم ليبيو الخارج يعولوا على من هم
بالداخل ؟
• فنرى أنه لا مجال للجدل هنا
فالإجابة ستبقى أيضاً محبطة لنا جميعاً .. فهل
الرؤية الواحدة وتقويتها دونما أن نعمل للفاشيين الجدد أي حساب أو ميزان ..
بل العمل مهما قلة أمكانياتنا .. بل لننتزع تلك الإمكانيات نزعاً
ولنجعل الحرف والكلمة أكثر قوة .. ولنعمل بجهد
بالغ لتكون الكلمة الأن كلمة وغداً محاكمة لمن طغوا وحولوا ليبيا لفساد ...
وبل حسابنا الوحيد هنا هو الله وليبيا فقط ..
وقد صدق من قال: "اللي بيده حيطة أيطوحها
يا ههوه".
مساهمات سابقة:
سعرالبرميل
النفطي 86 دولار
هل تم القبض على الخائن
؟
حسن الأمين وأفواه للحربوات الناطقة
الغولة وبنياتها والحليب.. والإيدز
راجع:
|
