15/01/2008

كل الرسائل تنشر كما هى وبدون تصحيح للأخطاء الإملائية أوالنحوية

نجاح المساعيد والعشرة مليون يورو من الخزينة الليبية

(عفوا الحوار بالغة الدارجة الليبية وهو غير مقبول لمن أحساسه مرهف أو ميت)

تحية طيبة وعذراً أيها الأخوة أنها غير طيبة

قالوا أن العلم نور وأنا اؤكد لكم أنه ظلم وظلام, يا ليتنا كنا دون هذه التكنولوجيا لكي لا نصاب بالوجع وياليت يدي لم تتحرك عبر السي الجوجل اللعين... ولأصادف هذا الخبر المزعج, وكاننا ينقصنا أخبار مزعجة... وانا أنقول خيره ضغط الدم قعد عند الليبيين بالبلاش ولا السرطان قعد بالبراويط... تي ماهو الموضوع فيه طلوع !!

يا يطلع صاحب الخبزة والمي ومحرر الإنسان وصاحب قصة الحمام (ولدي باع فرخين أحمام بيش إيوكلنا) وصاحب كل المعجزات... بهذا الموضوع بالذات لازم يطلع ويشرح لليبيين هذه الكاينة... بلاش يطلع صاحب النظرية الجديدة (ليبيا الغد) ويحكيلنا على عرس الأمير الأموي {وليد قذاف الدم} على السمحة نجاح المساعيد... ولا يحكيلنا على قصة على بابا والقطط السمان... لكن عمري ماشفت قطوس يجوز بعشرة مليون يورو!!! تي بلكي حتى هو بايع دجاج ولا ديوك من خزينة عمو (قذاف الدم)... بلكي بلكي...

لماذا لم نرى الخبر على الأقل بالصحيفة الشفافة تبع ليبيا الغد (أويا .. أو قورينا ؟؟؟؟ّّ..) بيش تعرفوا الكذب والبلعطة على وذنوا... بلاش... لماذا لم نرى هذا الخبر مدون بالربع الخالي على (ليبيا اليوم) مثلا الكترونياً ..اذا فيه بلعطة كبيرة... بلاش... هل قرر أعضاء المؤتمر الشعبي (بوكناسة) مثلاً بالصياغة النهائية أنه (قرر المؤتمر الشعبي بوكناسة أجراء زواج السيد وليد قذاف الدم من خزينة ليبيا بباريس بمبلغ عشرياة مليون يورو نظراً لحالته التعبانة)... الثروة بيد الشعب... أه... تي ماهو الموضوع فيه أطلوع يا بني أدم ..يا يطلعو هما يا أنتم... لا خليكم راقدين والنهار لسود داير عليكم وفيكم باهي.

الشفافية... الخبزة والمي... الديموكراسي... حكم الشعب لنفسه... الشعب السيد... النهر البهيم... الفكر البديع... لا مهضوم لا محروم... السلطة والثروة والسلاح بيد الشعب... بلاش... بلاش.

الموضوع فيه أطلوع ولا خروج... يا يخرجو هما يا أنتم, أمن يقعد الموضوع موضوع أثارة ويعدي كيف اللي عدا فهذا والله ما ايسير... يا الليبيين... يطلعوا للشوارع يا أنتم تطلعوا تحكولنا كيف ما حكيتوا على قضية الايدز (أدريس لاغا بحا.. أه ؟)

أنا لن أنظر لكمشة الهمج اللي يحكموا ليبيا... سأنظر لمن ينتمي لليبيا بس, وأقول لهم والله حرام فيكم الهوا أمتاع ربي ؟ ليش ليش ؟؟ والنبي مزلتوا منطمرين يا هووه... بلاش بلاش الناس مش كلها تعرف... لكن المواقع الليبية واللي أيدير فيها وااللي طايح مزالة يعرف.. وطالما يعرفوا يبقى يقلبوا الدنيا ولا تقعدوها إلا والليبيين كلهم يعرفوا ...لتنزع كل المواضيع (السياسية والجيو سياسية والفلسفية) وتوضع هذه الصورة لمدة ثلاثة يوم بس... كل المواقع تقفل ولتضع هذه الصورة بس وتحتها تعليق مهذب من أربع كلمات (زواج وليد قذاف الدم) بس... اللي يدخل على هذه المواقع من طايحين المزال.. يجد هذه الصورة بس !!! وجعنهم ما قاموا !!! طبعا الرد من ذوي العظمة سيكون.. خرف.. ولا خرف.. لعند قعدنا أنخرفوا كلنا.

عشرة مليون يورو تسلم نقداً ومجوهرات وأحجار كريمة وليلة زفاف بباريس فرنسا !!!

السيد ولد الثروة ولد أحد السبوعة (قالك قطط... قطط من ؟) ولد شيخ القذاذفة المفــ (وليد قذاف الدم) يفعلها مع الحسناء الشاعرة نجاح المساعيد ليتزوجها طبعا مش بخيمة متواضعة بظهر سرت.. لا.. يتزوجها بمقاس جلده وجلد اللي خلفوه بباريس الصقع !!.. وطبعاً العملية أصبحت سباق محموم على من يتزوج سمحة اكثر ومن يهبش أكثر من ثروة المظاليم الليبيين... قالك جماهيرية عظمى ...لا هي عظمى وعظمى ميه ميه...

والليبيين يداعكوا على الحدود مع تونس بعد ما باعوا اللي وراهم واللي قدامهم بيش أيعالجوا نهارهم لحرف.. خزية.. لا خزية كبيرة يا معشر الليبيين...

قورينا... أويا هل جاءت بالخبر ؟؟؟؟؟؟؟؟؟؟

شفافية الزندفة والكفر... فكل من يدور بهذا الفلك فهو كافر... والفتوة على أرقبتي.. يا جماعة الشيوخ أمتاع جومعنا.. يحكولي على عاشوراء !!! تي أهي العاشورة اللي على وذنها ... وكنك قلتلهم شوفوا هال الكواين... يقولوا لك الله يهدي.. الله يهدي من ؟؟ ناس ميته ولا كيف !! الله غالب.. غالب – وتقعد طبعاً زنديق مارق وكافر ... وربما يتطاول أحدهم عليك ويقولك تراه أسكت يا فرخ !!
أعويلتكم وأصغاركم فطورهم بالمدارس خبزة وشاهي... ولا لحسة زيت... وولد سي قذاف الدم يصرف الملايين على زواجه الميمون !!!!!!!! زادوا المرتبات لا ... زادوهم يا طايحين الجهد وانتم ساكتين على العار ... والله إلا عار باهي.. ومن يسكت بعد هكي يقعد فيه حاجتين أثنين لا ثالث لهم يا ــ ــ ــ يا ــ ــ ــ باهي هنا حاجتين أثنين لا ثالث لهم.

ولا عمتك ليبيا المستقبل تنشر خبر مفاده أن ولد عمو القذافي تحتجز سيارته الفراري بألمانيا لأنها غير صحيحة الأوراق وهذه العمة الفراري السيارة يصل سعرها لأكثر من 450,000 يورو.. ولد يوريه.. أو أوقية من خزينة جد بوهم المنياري لول هضك.. باهي يا المستقبل هذا خبر خطاء وغلط.. لأنه بصريح العبارة يزيد من ضغط الدم والله ...توا مش حرام عليكم أتزيدوا في ضغط الدم, وبعدين تبو الليبيين يعرفوا ولا شنو, يعني تبوهم يطلعوا للشوارع ويقعمزوا فيها ولا ينطقوا بكلمة ولا شنوا ؟ لا حرام عليكم.. تي أصلاً الدنيا توا صقع عليهم والمفروض أتراعوا ظروف خوتكم بالداخل من الصقع وضغط الدم ...خلوا الدنيا لعند تدفى وبعدين جيبوا خبر الفراري ولاحتى الكنداري... مرعاتاً لمناخ الليبيين الصقع خوتكم بالداخل ...حرام والله الدنيا عليهم صقع ...والخروج للشوارع يحتاج لنشرة جوية دقيقة.. تحكي أن الدنيا صقع ولا مش صفع... وبعدين يا موقع المستقبل والله إلا حرام عليكم تنشروا في خبر أصلاً ما قلوش في إذاعة الصدق والنور والشفافية إذاعة الجماهرية العظمى اللي تخصصها وصل وأستقبل... يعني لازم تنتظروا أشوية وحتى حلول القرن الثاني والعشرون بيش أتقولوا الخبر.. لا حرام عليكم يا موقع المستقبل !!

فربما قرر مؤتمر الشعب العام شراء سيارات الفراري... ربما ربما... ربما قرر مؤتمر الشعب العام زواج وليد قذاف الدم بعشرة مليون يور.. لربما ربما... ربما.. ربما ستخرج الوجوه المسقعة تحكي على الميزانية... ربما ربما ...تي ربما... ربما.

لا والله لوكاني أنا من غدوة وبكرة نعلن الإضراب العام بكل ليبيا... تكيف.. تي كيف ؟ لينعقد المؤتمر المعارض من بكرة ويبدوا في جلسات المؤتمر على الطريقة التالية.. لا وجود لأي ميكروفونات ولا كلام.. كل واحد بالمؤتمر المعارض عنده الويحة بها صورة عمو وليد وعمتنا نجاح المساعيد:

رئيس المؤتمر يأتي بأشارة البدء برفع الصورة... (ممنوع الكلام, مؤتمر لاكلام فيه.. أشارات بهز اللوحات فقط... ومن تريده أن يجلس تعطيه الإشارة أجلس باللوحة أمتاع الصورة... والكلام بالاشارة فقط... بيش قناة الجزيرة المباركة أتجيبكم في برنامج غرائب من الدنيا... هذه الصورة فقط يا عربنا....

ليخجل كل من يراقب في مثل هذا البريد ..ليخجل ويتحشم كل يكتب بالتقارير على خوته ..ليتحشم ويستحي على وجه من هو كرار حبل لمثل هؤلاء الحثالة..ليستحي على وجه اللي ترمى له عظمة كالكلب بيش أيبص على الناس... تي راهو الدنيا مزال فيها حشم يا هوه...

فهل حضر هذا الحفل الجالية الليبية بفرنسا.. ومن هم المعازيم ؟.. فالأمر يخصنا فطالما المصاريف من بيت مال طايحين المزال الليبيين.

بنغازي17
حركة العصيان المدني بليبيا
 

مساهمات سابقة:

  حارسات القذافي

  دموع مدرس إعدادي

  الإتجاه المعاكس: الأستاذ محمد بويصير والمواطن الليبي الطويل الهافي (1/2)

  القذافي والمواطن الليبي (قبلي صرهادي) وجهاً لوجه (1)

  القذافي والمواطن الليبي (قبلي صرهادي) وجهاً لوجه (2)

  القذافي والمواطن الليبي (قبلي صرهادي) وجهاً لوجه (3)

  سعرالبرميل النفطي 86 دولار

  سعر برميل النفط يتجاوز الـ 92 دولار للبرميل

  الشيخ مستر تخصص بقايا الجبهة (وقـصة البنت الهولندية)

  هل تم القبض على الخائن ؟

  حسن الأمين وأفواه للحربوات الناطقة

  صدق ولن تصدق (باب الحارة ورمضان بليبيا)

  فيدو النهر الدموي وصقر الميدان والعصيان

  موطنوا سرت العظمى (عبدالباسط محمد.. والفضاء وحيداً)

  ما الذي وراء برنامج بلا حدود بالجزيرة؟

  الغولة وبنياتها والحليب.. والإيدز

راجع:

* إصدارات حركة العصيان المدني بليبيا

* راجع: حركة العصيان المدني بليبيا مجموعة طرابلس فيديو (5) مذبحة سجن أبوسليم

* راجع: حركة العصيان المدني بليبيا: تقرير عن حالة الفقر والتجهيل الممنهج وأسبابه بليبيا