|
29/04/2008 |
|
|
|
|
دعاية أنتخابية بثروة الليبيين للمرشح جديد (3)
{أعتذار شديد اللهجة للفنان الزواوي.. وعفوا الحوار باللغة البنغازية }تحية طيبةوعذراً لقول الحقيقية بشفافية:وهكذا لن يفهم سي الشخيص معنى أن ليبيا وأهلها لا تستاهل كل هذه المعاناة لأن جعلنا على قلوبهم حجر .. وتراب واجد ..وفلوس هلبة ووجدات ..وبعدين هو شنو دخله بالأجيال القادمة تعلمت ولقت وطن أكويس ولا لأ.. (الشخيص الجاهل) نموذج متكاثر بداخل المجتمع الليبي وربما هو أفضل من اللي يحمل السلاح والكلاشن بوجه ليبي كيفه, وهذه كلمة حق بحق (الشخيص) ... فالشخيص على البطينة وبس ... لا دم .. لا أر. بي. جي.. أنعيمة يا بوها .. فالشخيص تخصص أوكال ومص دم بس ... لكن تسييل الدم مش تخصصه ...تخصص ناس اخرى لا حاسبين يوم أمشقعرايجيهم وتحاسبو فيه ... لا يوم أسماه اخرة.أذا يستمر الحوار بيني (العبدلله) وبين (الشخيص) و(المنطمر) وهذا هو الجزء 3:*******الشخيص: وتقولي الدوا مش لاقيينا الليبيين في صيدليات المستشفيات العامة ... تي ماهو ما السرقة .. وأعذرني أنقولك ومعليش في هال الكلمة .. الليبيين مش متربيين يا عبيدالله ... هما شنو اللي خلو ما سرقوه ... تره قولي ... طشت هال النفط بس لوكان يوصلوله ... راهو راكبين فيه سرقة ومص بالتبوات ... لوكان إيحصلو كيف بس ... تي والله أيهدو عليه .. وكملوا جد اصله .. في يومين بس ... لكن القائد وجماعته أمحافظين عليه أكويس ... واقفيلكم على ابيارة كالأسود ... أه ... أمالا.. شنو .. لوكان هضا لبلاد راهي من زمان رايحه فيها.المنطمر: يهز برأسه .... مخرجاً شفته السفلى للأمام ليضغط عليها بالشفة العليا.العبدلله: أسمع يا شخيص يا سمح يا نزيك .. أسمع .. أسمع .. الليبيين طبعاً مجتمع كيف هال المجتمعات الاخرى فيهم الطيب وفيهم اللمد ... وفيهم الصالح وفيهم الطالح .. لكن فيه نوع أخرى تلقاه ولد اصل وولد ناس من هال البلاد .. ومرات تلقاه متعلم ومرات تلقاه جاهل .. غني وفقير ... لكن النوع هضا صدقني مستحيل ايمد يده على شي مش أمتاعه...... وبعدين غير قولي تكثر الجرائم الكبيرة والسرقة أمتى ؟ ... بوقت الحروب ديما ... لكن ليبيا أتقولو مش بحالة حرب .. واللي أيقولها يعني واحد مهبول هذي أثنين .. ولأن الحرب اللي تعرفها انت طبعاً فيها طيارات ودبابات وقتل ودم وغم ونكد ... ولا تلقى دوا لا تلقى مستشفى أتعالج فيه لا تلقى مجماج تاكله ... لا تلقى مدارس.. زيعني حوسة كبيرة ... وتلقى الناس سكارى وماهم بسكارى ... يعني ... تعالى ... تعالى .. يا حبيبي ,اعرف كيف عايشين الناس المصقمة ... الليبيين اللي مش لمد ... يا حبيبي .. يعني اللي ساير في ليبيا حرب وحرب البسوس اخرى ... إلا سنة ونص... تي الحرب تكمل في شهر ولا أثنين ولا حتى في سنة كان طولت ... لكن نحنا وين يا بوها...المنطمر: أيضاً يهز برأسه مبتسماً ... ولكن يغير أتجاهه للخلا مع فتح فمه بطريقة واسعة.الشخيص: توا يعني أتكبر في الشطحة ليش بالله عليك ... وراهو يسمعك شي مصري ولا سويسري يحسابنه إلا عقاب فترش ... لا أنتم أمكبرين الموضوع واجد يا خويا يا شخيص ... وبعدين ماهو قلنالك أهي القيادة أفطنت توا وتبي أتصلح لبلاد وتبني المصانع والمطارات وتشوف حال المواطن بالزبط .. أهالعبدلله: ثمانية وثلاثين سنة وعام ... يعني أكثر من جيل راحو هبائاً منثورا وأتقولي يبو إصلحو ..تي صلحو شنو بالله ... وبعدين من اللي قالك الليبيين يبو مصانع ولا مطارات ولا حتى أطرق ... الليبي يبي يشعر ابروحه أنه بني ادم وله كرامة ابوطنه بس ...مش أمهزب ما أتقول إلا قزون ميتين هله كلهم ...الليبي ما يبيش إلا وطن يحميه ما الفقر والمرض والجوع .... الليبي يبي كرامة ... مش ضحك بزيادة مية أجنية أيساون سته وسبعين دولار .. والدولة واجعاتها السبعين دولار طبعا .. ودونك (أنظار نهائي بفتورة الضي) البنزينة من جيهة وشيشة الزين من جيه والتلفونات من جيهة اخرى ... وحلب في دمه نين رايح الليبي ما أتـقول إلا عصاة مكنسة .... شوف الشارع الليبي أكويس يا بورج عاجي ... وشكلك يا شخيص ماتنولش للشارع بلكل ..*المنطمر: هذه المرة رافعاً يده اليمنى ليسقطها على اليسرى مع ليحك يديه معاً !!الشخيص: لا .. لا أفطن الروحك راني ولد هال البلاد يا شخيص حتى انا ... وجدودي حاربو حتى هما الطليان.. ودافعوا علي هال الوطن يا خويا .. وأنا مش في برج لا عاجي لا أكرنكاطي ... وبعدين تحكيلي علي الغلا في البلاد ... والأسعار نار شايطة ... تي هذي موجة غلا في العالم كله مش عندنه بس.العبدلله: لا سامحني يا شخيص مقلتش أنك مش ولد هال البلاد .. لا لا ... وبعدين لوكانك لمد منحكيش أمعاك صدقني ...المنطمر: يضحك بصوت عالي هذه المرة ... أيضاً وكأنه يريد أن يقول شيئاً لكنه ألتزم الصمت كالعادة.العبدلله: وبعدين أتقولي موجة غلا بالعالم كله ... ههههه .. أين عالم هضا !!! تي نحنا المفروض مانقيسوش روحنا مع حد ... تي النفط أيبيعو فيه (بالهبل...... {كلمة دخيلة على قاموس الليبيين جاءت مع اللمد} بالهبل يا با .....) يعني يا شخيص كم عدد السكان وقسمها على الذهب لسود ... يطلع فيها ... يطلع فيها ثلاثة أقروش ونص لكل ليبي .... وبعدين أتقولي كيف العالم ... باهي طالما كيف العالم لا خر ... تي خلونا كيفهم يا سي البي ... على الأقل شي أنتخابات كذب ولا شي دستور يا أسيادي ... مش راكبين فيها مؤتمرات .. مؤتمرات .. مؤتمرات .. لعند الليبين ريقهم نشف من حاجة أسماها مؤتمرات ... وتلقى سي أحمد ابراهيم ولا شلقم مرة وزير خارجية ومرة وزير مالية واسطوانة ما تبش تكمل شكلها ... تباهي .. تي والله تي حتى عاشور لحول يقدر ايسير الشعب الليبي ... تي عداد تزايد السكان أنا أنكدلك ان صبا وتوقف عندنا ... غير شوف الناس اللي ضاربهم السكر والسرطان عندنا !!! وبعدين تي مرات الجنازات ايخش في بعضهن من كثرة الموت عندنا ... ولا هذي فيها معارضة حتى هيا .. أه ... تي والله المفروض أنعيشوا أحسن ناس بالعالم والدنيا مش رايحين ذوايح في ابلادنا ..يا شينك حالة يا شخيص ..الشخيص: يضحك هو الاخر ...المنطمر: بدا يضحك حتى هوا ولكن شكله اشجع ... وخلها بصوت عالي واجد هال المرة.أنتهى جزء الحوار 3
بنغازي 17
|
|
