|
27/04/2008 |
|
|
|
|
دعاية أنتخابية بثروة الليبيين للمرشح جديد (2)
{أعتذار شديد اللهجة للفنان الزواوي} و(عفوا الحوار باللغة البنغازية)تحية طيبةوعذراً لقول الحقيقية بشفافية:إذا كان الحوار مستمراً بيني (العبد لله) وبين (الشخيص) و(المنطمر) .. ولهذا فمن الممكن أن تتضح الرؤية أمام المنطمر لكي يقول رأيه بصراحة ...لكنه أصر على الصمت ربما خوفاً على العويلة .. ومرات يزرق بشي كلمة هكي .. ولا .. هكي .. أتودر تاريخه وتاريخ أعياله الى الفضاء ...الى الفضاء ..ويصبح ربما الرجل اللي انتحر بقصة (الأرض .. الأرض .. وانتحار رجل الفضاء) ... أذا أحب (المنطمر) أن يكون كالناس اللي تعيش بقصة (دولة الحقراء) للروائي المبدع (معمر القذافي).*******الشخيص: وبعدين أتقولي حتى الكورة فشلوا فيها ... أهمــاه بدوا ... وجابوا كاس أفريقيا بالكورة الخماسية. ولا الخماسية مش كورة.المنطمر: يهز برأسه مبتسماً ....العبدلله: (ضحكت كثيراً هذه المرة) مبارك .. مبارك ... على الخماسية ... والله يا شخيص أنا انتمنى أن تاخذ أبلادنا حتى الأربعينية مش الخماسية بس ... لكن أنت غير شوف الأسماء اللي دارت هال الخماسية والمشرفين عليها , وما أتقول لا فيه على الأسود لا بن سويد لا سعد الفزاني .. ولا دوزان الـ77 ... تلقى عمو عبدالسلام الساعدي القذافي !!! مش عارف منو ...القذافي ...بريمة شلاك القذافي ....لباس هضوما بس اللي يفهوما ولا شنو بالكورة ... بلا تي حتى الكورة فيها العائلة المالكة ولا شنو ... وبعدين لا خماسية لا كرنكاطي .. هذه مباريات ( أستاك) يا فالح ...لمدولي كم واحد وطلبوها أمعاهم عيني عينك ...وبعدين هضا مش كاس أفريقيا اللي جابوه المصرية وداروا نهار أحمر ... وبعدين كورة من هذي ... في ايين أبلاد الحكومة أتجي أبوكاشيك وتهدم نادي عقبات الليل ...بلاش النادي لهلي حتو هو معارضة ولا شنو بيش يركبو فيه تهديم !!المنطمر: أيضاً يهز برأسه مبتسماً.الشخيص: بلا .. بلا عليك حقد هضا ... تي هضا شنو بالله ؟.العبدلله: لا .. لا .. مش حقد يا خويا الشخيص ... أنا نبيك أتنافشني بس وترد على السؤال بس .. من اللي يحقد على أبلاده وينكر أصله ... الكلب بس (خايف أنرقيها للشخيص يمشي أيهز راسه ويقوللهم راهو فيه واحد قال .. بريمة شلاك القذافي .. يا عمي .. أهواه ... أهواه ... ويكركر الجماعة عقبات الليل للحوش ... أطلع أطلع يا كلب .. أطلع يا طايح السعد ... أطلع وأنت أتكرس ... فطنالك يا أشاربو (وفيه واحد منهم يقول: اتلع يا تايح السعدي .. يا أمعفن .. يا لجرب .. تعالا .. تعالا .. يا غالي .. كأنه مصري الجنسية.الشخيص: هضي هيا الأفكار اللي أمشوشة على على روسكم واللي زراعينها (ال..) المعارضة فيكم ....العبدلله: (بضحكة خفيفية) ثمانية وثلاثين سنة والتاسعة بالطريق .. وعمك المعارضة أمشوشة على أفكارنا.... وهما سبب الهجرة العكسية لمستشفيات تونس والأردن .. خزية يا معارضة يا شينة ... خزية عليكم يالي خليتونا ذوايح في أبلادنا ... خزية يا معارضة يا ليبية ... ياللي خليتوا الجنيه الليبي بربع دولار.. وجماعة أحمد ابراهيم يأخذو في الدولار بالكمشة وبالباكوات والصناديق و وبلبلاش ... خزيه يا معارضة يا ليبية خزية يا معارضة يا ليبية .... يالي شوشتوا على الفكر المبدع والنظرية وخليتوا الجوع والفقر والمداهمات الليلية تجتاح أديار نوم الليبيين عقبات الفجور ... لا هوا المعارضة الليبية هما السبب بعرقلة الثورة بيش تخدم ليبيا!!!.. المعارضة الليبية الشينة هيا سبب حكية الحليب وصلت لجنيه ونص .. والبنزينة لسطاشن قرش.. وقالوا توا انريكم كيف توصل لربع أجنيه الليتره .. وزيت السيارات بلا عليك حاله سوده ... وعال الخبزة يا بوها ... أنها أكثر فائدة من الفجل يا سادة يا كرام.المنطمر: يضحك بصوت عالي هذه المرة.الشخيص: أه ... اها ... هما اللي سرقوا لبلاد وعفسو منها .. أهاه ... هما اللي يبو أيدروا صحافة ومجلات حرة .. بيش اسربوا لفكار الهدامة الأمبريالية .... ودخلوا مع الاستخبارات الأمريكية وتأمروا على ليبيا أبلادهم.المنطمر: (شكله روحه زانه المنطمر ... وبدا يضحك بصوت عالي واجد)العبدلله: أسمع يا صاحبي يا شخيص (طبعاً ضروري أنقوله صاحبي ..!) والله هال الناس اللي تحكي عليهم إلا ناس ليبيين كيفهم كيفك ... ويا ولد والدي أعفسوا ما البلاد غصبن عنهم ... بعدما شافوا ليبيين كيفهم راكبين فيهم قتل وتشنيق بلا سبب ... نعم بلا سبب ... كم واحد منهم إيدور فيه البوليس والأمن الداخلي والخارجي والحرس البلادي و.... علي كلمه قال فيها راهي ليبيا رايحه فيها ..... وكم واحد حصلوه الجماعة وقعد لعند أكبروا أعيال أعياله ..وهو بالسجون .. كم واحد خششوه للسجن وها بعمر خمسطاش واربعطاشن سنة ... شوف أكويس للناس اللي بالمعارضة يا شخيص ... تي من أوجههم تعرف الفارق بين الشخص المتعلم وولد البلاد اللي أحب ليبيا وبين اللمد.الشخيص: من اللمد ؟؟.العبدلله: اللمد يا خويا (الحميم طبعاً) من أمثال اللي خش على العويلة ببوسليم وطلق الرصاص عليهم .. وقتلهم وعدى تعشى (أمبكبة) ولا تمجمج رزبالقديد (مجماج طبعاً وانشالله)... وما قالش بلكي هال العويلة أعيال وطنا حرام علينا نقتلهم ... اللمد يا صاحبي الشخيص ... هو اللي قال لرجال بنغازي عدو شوفوا صبياكم ... بعد أكتشاف الإيدز بمستشفى بنغازي ... أتذكر هضا الكلام يا شخيص ولا.. لا .؟ اللمد يا شخيص اللي حرم الليبيين من الصحة وحرمهم من شرا لوكال الصحي ... اللمد يا شخيص هوا اللي حرم لبلاد من العلم وشرك أكتابات الانجليزي وقال (هادي ... كتب الأمبريالية) ... وحبس دكاترة الجامعات بالحبوس وقال عليهم .. الرجعيـــة ... اللمد يا شخيص هوا اللي يكذب ليل نهار عال الليبيين ... اللمد يا بو صاحب اللي كدس أعويلتنا في الفصول المدرسية ..وما أتقول إلا عدد سكان ليبيا اربعمية مليون .. وهما حارتين وواحد ونص ... اللمد يا شخصون هو اللي تنطر على الليبيين بالحبال وهما أيشنقوا فيهم, وحتى الطليان ما دروها... اللمد يا أشخيص يا صاحبي هو اللي قعدوا كيف القطاطيس ياكلو لعند يشبعو ويقول كمان ... وأنكروا خير هال البلاد عليهم ... اللمد يا يا شخيص هو اللي داس راسه بين الروس وقال يا قطاع الروس خزيه ... اللمد يا..الشخيص: بلا يا عليك حقد هضا ...المنطمر: هذه المرة متجهم.العبد لله: عرفت اللمد توا يا شخيص ولا أنزيدك.الشخيص: لكن قولي توا يا العبدلله ... توا مش نحنا خير ما ناس واجده ... شفت المصرية اللي تقاتلوا على الخبزة ...وشوف العراقية والنهارات السود اللي سايرة فيهم بعد ما باعوا أبلادهم ... شفت البصرة والرمادي ...ولا لا ؟ شوف أبلادنا والخير اللي قاعده فيه ... هضا من فضل من ؟ ماهو ما السياسة الحكيمة ما القايد وجماعته ... أنتم بنعيم لكن مش شايفينه.المنطمر: ينظر للاعلى ولزال العبوس على وجهه.
العبدلله: ماهو يا شخيص فيه حاجة
ضروري تعرفها أكويس ... الوطن هضا لازم نشعر به .. ونشعر برائحة أترابه وطينه
وغبارة أكويس مش بنة نفطه وأفلوسه بس ... الوطن هضا يا شخيص لازم أيكون لنا
كلنا ... الوطن هضا يا شخيص ماتوا ناس واجدين علا أترابه ... الوطن هضا يا
شخيص ناس واجده كرهاته لأنهم أشعروا فيه بالإهانة ... يا شخيص الوطن هو أكبر
حاجة لازم أنحبها بعد الله ورسوله ....وبعدين قلت العراق ... هذي قصة أخرى
... وبعدين يا شخيص اللي ساير بالليبيين كيف العراق بالزبط ... شنو عاجبك ..
الكبد الوبائي ورد بالك اتدير تحليل دم .. أه ... ولا أوجوه شبابنا اللي
ضاربتهم الأنيمية والجهل والفقر .... هذي مش حرب كيف العراق ولا شنو؟ ... تي
خيرات البلاد محرومين منها هلها يا شخيص ... ولا النفط اللي يصرف على أوجه
اللمد مش نفط ليبيا ... ولا هضي كذبة معارضية حتى هيا ... وفيها أستخبارات
حتى هيا.
|
|
