سعر برميل النفط
يتجاوز الـ 92 دولار للبرميل
(التسع حكايات لأجل
الحيلة والحصار)
تحية طيبة
تقول الحكاية (1): كان
الحصار الأمريكي على ليبيا لأجل السلاح والطيران الدولي الليبي ... ولم يكون
حصار على الدواء مثلاً أو الحليب أو الجبنة أو أي من المواد الغذائية أو بناء
المدارس أو المرتبات أو الكورة أو السكن أو حرية الرأي أو كان حصار على النفط...
ولكن السيد الملهم ..فرحان بهذا الحصار وحوسها قدام أوجوهنا وضيق علينا لعند
الجمام ... وماسك في عبارة يرددها ديما: (أحني ما أنسلموش أعيالنا لحد ...
أمريكا أتحاصرنا راهو يا ليبيين .. وطز في أمريكا).
تقول الحكاية (2): لزال
حصار النظام الليبي الامبريالي الغاشم قائم على الشعب الليبي بكل شيئ يمكن أن
يحاصره لديه ...
تقول الحكاية (3):
الحيلة المالية والبنوك الليبية والرواتب هي الشغل الشاغل للمناضلين الشرفاء
والمعجزات العلمية بنظامنا الليبي, فالتضييق على حياة الليبيين تأتي من هذه
الخطوة .. بتحويل مرتباتهم مثلاً إلى أوراق للزينة .. فمرتب الليبي قسموه إلى
ثلاثة ليبقى أقل مرتب بالمنطفة العربية ... أي بأقل من 200 دولار للمرتب,
وبرفع الحاجيات المعيشية وبأغلاق منافذ أرزاق الليبيين من التجارية الخاصة
إلى الإستغوال على عقاراتهم ومصانعهم المتواضعة بإصدار قوانين التطهير وغيرها
إلى قوانين (الموزع الفرد) إلى قوانين ممنوع طلاء أي محل وبابه إلا (بالأخضر
الطرطاري) ونهارك يبقى رجعي كان زوفته بلون الإتحاد ولا الأهلي ولو كان
مشروعك دكان جزار ... ممنوع وممنوع راهو...
لعند لبلاد أقعدت ما أتفول إلا زاوية سيدي الخنباوي !!
تقول الحكاية (4):
أكتشف علماء (ليبيا الغد) الجدد أو الوارثون الجدد
... مؤخراً أن سبب تأخرنا عن مستوى التعليم بدول الخليج (ضرة النظام) ألان,
وضيق المدارس على التلاميذ الليبيين هووجود الأجانب بليبيا من الفلسطنيين (طياح
المزال) إلى المصرية (معانا كوبيات أعويلة) ..وغيرهم .. فــلتصدر القوانيين
بالخصوص (وما أسهل أصدار القوانيين بالجماهيرية) بأغلاق الأبواب المدارس أمام
تلاميذ الطلبة من العراقيين (الذوايح), وطبعاً هذه الفترة فترة (اللهمجة) أي
من يريد أن يدرس بجماهرية ليبيا الغد عليه أن يدفع (أقلوس) ... ألم يلاحظ
الليبيون أن هذه الفترة أصبحت البلاد (أنويرة) ؟ والأسعار أصبحت كالهشيم
تذروه الرياح ... ربما هذه خطط أستراتيجية
مستقبيلة لإفناء البقية الباقية من الليبيين ... وبعدين من اللي يقدر أيتكلم
من العرب توا ؟ الفاتح ثورة علمية ..الفاتح ..
وحدوية .. وحدوية ..... وتوا حولية لهمجية يا بوها.
تقول الحكاية (5):
مواطن ليبي باع (أسكورطة سيارته) بيش يشري دواء حرارة لأبنته المريضة ...
(أعلان .. أعلان):
أي واحد يستحق لقلوس بالله أيجيني راهو عندي (كوميستي عنقاري) ... مش
مشكلة حال العجلة المهم أنها منفوخة بس ...تعالوا يا جميع المستحقين من عامة
الشعب الليبي ... الكوميستي أمتاعي بالخدمة لأربعة وعشرين ساعة يا بوها ..
الليبيين بس يا خوتنا العرب ... معليش
الموضة توا أفريكانو يا بوها ... فكم طالب أفر يقي
تصرف عليهم ليبيا بداخل وخارج ليبيا ؟.
تقول الحكاية (6): ليبي
يصرخ فجأة بنومة (تي خوذ النص ...خوذ النص ..النص أكويس.. تي خوذ النص), وأذ
بزوجته تجعله ينهض من نومه وتقول له (نوض نوض نوض ... نص شنو.. نص شنو ؟ ..
فاصوليا ولا حرايمي) تي وأنت حايس فيها أوكال ولاشنو وحتى ونت راقد ؟ ...
فيقول لها معاتباً: حرام .. حرام ..
حرام .. كان خليتيني أشوية بس ... تي أقريب ..
تي قريب ما أقنعته .. قريب ما أقتنع الحصلة السودة النودة ...
أشوي ما أقتنع.. يا حصلة !!! تي من هضا ؟ من ؟ فيقول لها: تي كنت
بحوار مع القذافي بقناة الجزيرة (الاتجاه المعاكس) وما أقريب إلا أقنعته !!
هو أيقول النفط الليبي كله ليا ولعيالي ... وأنا أنقوله تي خوذ النص أكويس يا
قذافي .. ألنص ممتاز تجارياً ...
تكنك داير بالمكر يا سي الهايــــ .. تي حرام عليك يا راجل
.. تي راك زامط الدنيا كلها ..
النص واجد وهلبة وسو ماتش فور يو ... خلي النص شورك ولاخر شورنا ...
(تي أسكت يا سي القاسم تراه) ... رانا كلنا من عرب هال الوطن ...تي
حتى فيصل القاسم أفتنع أبكلامي راهو ... حرام كان سكرتي فمك أشوية بس ...
حرام كان أنطمرتي فايف مينت بس !!.. لاحول ولاقوة إلا بالله ..
تي أقريب ما صارلا فيها القناعة كنز لا يفنى والله ...
تقول الحكاية (7): شرطي
ليبي ضرب عامل مصري ... ففتح محضر بمتابعة من السفارة المصرية .. وعندما سئل
الشرطي عن سبب ضربه للمصري .. قال بالمحضر: أتمشلط
بالشوارع وينوض في الناس الجماهرييين (أمعانا طناجر عزا .. أمعانا كوبيات
شاهي فنتازي... أمعانا بيجامات للنوم بعد هكي ما خلاص) ...
تي هضا توا مش أزعاج للسلطات الثلاثة ولا لا (السلطة والثروة والسلاح)
... تي أنا عضو بمجلس الأمن يا خروات .. وأمريكا
والأف بي أي راهي أمعانا .. وكان درتو فيها حاجة تعالو دقولي وشمة خضرا باهي.
تقول الحكاية (8): يقدر
عدد الليبيين المغتربين (التسمية الجديدة) بالخارج بالآلاف .. ولكن كلهم لا
يحملون تليفونات ..
فقراء العوازي .. معليش .. وأيقطعوا في الوجابي
مساكين ... !!! ومن بين عشرين متصل بأي برنامج تلفزيوني فضائي, ويخص الشأن
الليبي لا تجد إلا واحد بس ليبي أحتمال أسماه عمران !! أو واحد أسماه أمعزب
من ليبيا .. طبعاً مش لجان ثورية هذا.. لجان
نواوية راهو ... وكان الجماعة عابيين علي جوه (كان
أعباك علي قراندايزر يا أقعادك تشبيهي لدامبي).
تقول الحكاية (9): بعض
المواقع الليبية رايحين اللي ديروا فيها ... ما أتقول إلا يرقدوا ثلاثمية
ساعة في اليوم ... صفحات قديمة, جزء معزوق على
اليمين ولاخر على ليسار !!! أخبارها أمتاع السنة اللي فاتتت ! ...
مش أتسكروها خير يا أعويلتي .. يا مضانيني
... وبلا هال التعب.. وخلو المفكر يفكر ابروق ... وانتم رايحيين إلا كيف
أذاعة الجماهرية العظمى.
كتبه بنغازي17
حركة العصيان المدني بليبيا
esslibyabz@yahoo.com
مساهمات سابقة:
سعرالبرميل
النفطي 86 دولار
هل تم القبض على الخائن
؟
حسن الأمين وأفواه للحربوات الناطقة
الغولة وبنياتها والحليب.. والإيدز
|
