12/08/2007

كل الرسائل تنشر كما هى وبدون تصحيح للأخطاء الإملائية أوالنحوية

ما الذي وراء برنامج بلا حدود بالجزيرة ؟

تحية طيبة
كيف طرحت المذيعة ليلى الشيخلى الأسئلة على المفكر الجديد الملهم .. وماذا قالت وماذا أرادت أن تقول وما لم تقله ؟ وماهو الإنطباع الذي تحصلت عليه بلقائها مع أبن المفكر المبدع صاحب القلادة الفكرية ؟ ولنحور اللقاء باللهجة الليبية ولنعتبر أن هذه المذيعة اللبقة ليبية ولكن ليست بالطبع كأمنة أبريك المثقفة الليبية الأخرى والملهمة وراثياً من قائدها الملهم ...فماذا جرى باللقاء بالتحديد وما خلف الكواليس ولم نراه ؟

* لضرورة تحويل الثورة إلى دولة وعن وضع دستور بالبلاد .. فمع رحيل الممرضات البلغاريات .. ولكن تبقى هناك علامات أستفهام سنحاول ان نطرحها الليلة .. لنبدأ أولاً من النهاية هل تشعر بأن هذا الملف (ملف البلغاريات) قد أغلق.

أولاً إني أبن الشعب الليبي .. وأبن النظام والنظام والشعب واحد !!! هادي ملاحظة جانبية .. وبعدين مستر جون منو ؟ تي هادا شخصية وهمية .. وأنا أبن القائد ولست بوهم.

* إذا انت أبن القائد ؟ والذي يجهزك ويجهزونك للحكم والتوريث .. وستصبح ملهم ودكتور ولتكون قائد وزعيم تحدي لليبيا جديد ؟

ايهه أني أبن القائد .. وأني أصلاً مؤمن ببونتيه مخترع الإيدز, والبلغار راهم أبرياء ولكن مش أبرياء (ضحكة مبدعة بدعة).

* هذا تناقض بأقوالك, فهل تعرض الطبيب الفلسطيني للتعذيب ؟

أيه تعرض للتعذيب, ولكن القضاء الليبي نزيه .. لا يهم القطة تكون بيضاء أم سوداء .. المهم تصيد الفيران .. المهم والمهم .. والاهم .. ومن الغير الممكن (سبحان الله يا زينك مبدع).

* يعني أنت تقصد أن الطبيب بريئ ..

لا هو أعترف .. لكن تعرض للتعذيب, وبعدين راهيييي ليبيا معادش فيها التعذيب راهو .. وخلاص أخر واحد تعذب راهو هو الطبيب الفلسطيني .. (ضحكة غير عاديه تسحن الكبد) .. ولكن لا يعني هادا أن الطبيب تعرض للتعذيب بالكهرباء.

* يعني لازم أترصي على بر هل الطبيب مذنب أم لا ؟

هو في الحقيقية مذنبريئ (يعني مذنب بريئ) على وزن بربر بربر والشيخ زبير وأسراطين والريس فين .. (ومعاها ضحكة بديعة بنت ستين الف بديعة).

* حسناً أنت ذكرت بحديث سابق أن الإهمال والتسيب والفقر بالمستشفيات الليبية هو السبب بالإيدز.

ايه الإهمال لازم نعرفوا من أوراه .. ولازم أنطلعوه من اللي سبب التسيب .. وهادا المتطرف أمتاع الشرطة راهو أنهبل بوكل .. وبعدين توا أنحسنوا وضع الصحة وأنحسنوا روسنا كيفي أني .. وبعدين راهو مستر جون شخصيه وهمية (ضحكة بعد هكي نو no .. no .. no ).

* إذا من الذي قام بحفن الأطفال بالإيدز ؟

مستر جون وهم .. الموساد الإسرائيلي خيال ووهم .. الدوائر الاستخبارات خيال ووهم .. البلغار وهم .. أحتمال كبير اللي قام بالحقن أيكون خيال ووهم .. وبعدين نحنا جينا لصاحب عمارة قلناله خوذ أثلاثين الف قال لا .. أعطيناه مية الف ..

* سؤالي اليك محدد .. من الي قام بحقن الإطفال ..؟ (يعني بنغازي بس بليبيا اللي أتم فيها عمليات الحقن .. وجهة ما تختبر في الإيدز .. (وقد اختارت هذه الجهة بنغازي بالذات .. وما خفي كان اعظم).

اللي قام بالحقن نحنا مش عارفينه من .. لكن الطبيب الفلسطيني وهم .. وعلى ما أعتقد وهادا رأيي الشخصي طبعاً أن العالم كله جا ضد بنغازي وحقن أطفال بنغازي ..

* لنتحول للمحور الداخلي

بعد الفاصل ام قبل الفاصل (ضحكة أتهبل بوكل والله .. يا زينك ضحكة).

* بعد الفاصل لو سمحت .. (والله مساكين يأهل ليبيا بجد).

- - - - - - - - - - - - - - -

* لماذا الملف الداخلي متأخر عن كل بقية الملفات ؟ (مسكينة السيدة ليلى الشيخلي تحساب هؤلاء يعرفوا الملفات اللي تقصدها ,,تي هؤلاء يعرفوا شكاير الكذب وملفات الدولار الأمريكي بس).

تمن اللي قالك متأخر تحني رصدنا (من جيبوبهم طبعاً) 86 مليار دينار لأجل بني عمارات .. وبعدين ...

* عفواً أنا أتحدث اليك عن التحولات الداخلية .. وبالكلمة التي ذكرتها منذ سنة تقريباً وجهة خطابك للفساد بليبيا وتحدثت عن القطط السمان وغيرها .. السؤال هنا محدد ؟ هل توجد قطط سمان تأكل بالأخضر واليابس أم لا ؟

(قطط سمان .. تهادوما دينصورات كبيرة) لا .. لا .. القطط السمان والحرس القديم هي خيال ووهـــم, ومعندناش لا قطط لا كلاب .. خيال ووهم .. خيال خيال, كما مستر جون وهم .. مافيش عندنا قطط سمان .. وبعدين حتى ابريطانيا تحصل بها تغيرات ولا نقعدوا نحنا دينصورات ولا كيف .. لازم أنغيروا اللعبة .. كيفنا كيف الناس لخره (يعنى بعد المؤتمرات أنغيروا لكيمونات وبعدين لجمهرة وبعدين أنتغيروا نقعدوا قطاطيس .. وبعدين ثعالب وبعدين إمبراطورية دولة الحقراء العظمى).

* لكن ابريطانيا بها برلمان وحكومة منتخبة .. (والرئيس الذي يأتي ستبقى صلاحياته معروفة وله فترة حكم محددة ومعروفة, يعني أبريطانيا بها رئيس وزراء لن يكون لا مفكر لا دبنصور طويل العمر .. فهل سيتحول رئيس بريطانيا لمعبود للجماهير وقائد ورب ؟؟).

لكن عندهم ملكة توارثت الحكم من أجدادها .. وبعدين القائد شنو ناقصة ؟ .. وبعدين تي الإنتخابات أتخلي الناس كيف السكارى .. ونحنا ما نرضوش الليبيين يقعدوا سكارة .. تي نحنا عندنا أنتخابات صناعة محلية أنسموها تصعيد .. والناس هما اللي يختارو في المسئولين مش أحنيييي .. يعني الناس هي المسئولة عن الفضايح اللي أتسير.

* يعني أنت أتحمل المسئولية للناس فقط ؟

ايه الناس هي المسئولة بس.

* أنت رفعة شعار للحرية والشفافية وأطلاق الصحف الحرة .. فأين هي ؟

أهي الصحف بدت تدخل للبلاد .. ومن زمان والحرية تشتغل بلبلاد ..

* لكن هل المواطن الليبي العادي راضي عن أداء هذه المؤتمرات ...( وبأستمراركم أنتم بالتحديد بالحكم ؟؟؟؟)
 

(رضا وأجعنه ما رضا) .. أيه راضي ويمارس في الحرية كيف ما يبي ...

* يعنى هل ستجرى أنتخابات وتعملوا دستور في ليبيا كيف بقية الناس ؟ هل من المعقول أنه لا يوجد دستور بليبيا.

(أنتخابات شنو .. دستور شني .. دستور بيه أنتخابات ..) تي نحنا عندنا مؤتمرات شعبية وسلطة شعب .. والشعب الليبي دستوره هو وجه القائد وأفكار القائد .. وبعدين بعد هكي شنو يبي الليبيين من دستور ولا فول.

* بس ليبيا بها الخمس من سكانها تحت مستوى خط الفقر .. عفواً .. عفواً .. بها 250000 عائلة تتقاضى بأقل من 120 دولار .. أليست هذه فضيحة بدولة غنية وتملك أحتياطي نفطي كبير..!!!

تي ماهو قتلك أحني قاعدين انوزعوا في الكومبيتورات على الناس .. وبنغازي وصلها لعند توا .. لعند توا أه .. 150000 كومبيوتر .. وقاعدين نبنوا رانا ..

* أنا أسألك عن حياة المواطن وحريته ببلاده, ولا أسئلك عن مبنى أو عمارة .! أنا أسألك عن الحرية للناس .. (والله مساكين يأهل ليبيا بجد) !

ليبيا بها أكبر حرية بالعالم .. (حرية على طريقة دفن الناس بسجن بوسليم, حرية أتكلم نهارك أحرف + اسود).

* ولكن هناك ناس رجعوا لليبيا وانتم سجنتوهم وسحبتم جوزات سفرهم ..أليسوا هؤلاء ليبييون ؟ ولهم ربما أفكار مغايرة لأقكاركم ؟ ويبوا التغيير بليبيا ؟ كما تريد انت هذا التغيير ... ربمـــــــا ؟

الشرفاء اللي رجعوا هم اللي سكروا أفوامهم .. واللي تكلم ذنبه على جنبه ويقعد خاين .. وبعدين مسكنا واحد منهم أيهرب في السلاح !!! ولو تقصدي الكمشة اللي بره .. هذوما مش ليبيين وعملاء .. وخونة ..

* عفواً .. عفواً .. لماذا تتهم هؤلاء وانت لا تعرفهم أصلاً ؟ ((فما هي معايير الخيانة عند هؤلاء .. هل بحقن الإيدز, أم تقطيع أيدي الناس بشوارع ليبيا ؟ أم باطلاق الرصاص الحي لمن أنزل علم أيطاليا, أم بقتل 1263 شاب ليبي بالسجن, أم بإهانة الناس بالفقر, أم بسؤ المعاملة بالوطن من التندي الصحي وانتشار الأمراض الخطيرة, إلى تزايد حالات الجريمة, إلى تبديد الأموال على نزوات العائلة الحاكمة والمقربون, أم الخيانة هي أنك ستقول الحق و أنك لن تسكت على العار, بل لتتجاوز حدود هؤلاء لأجل ليبيا, هل هناك معيار للخيانة مغايرة لما نفهمه أو يفهمه كل الناس, فما معنى الخيانة ؟؟؟)).

تي هادوما شرذمة توا أنوروهم .. (نفس النموذج إن لم تعلموا .. نفس الخام والمنبع).

* ماهو دور قائد الثورة بعدما تمسك أنت الزعامة والقيادة بليبيا ؟

تي قائد الثورة من حقه أن يقعد كيف ملكة أبريطانيا .. ومكانه محفوظ .. (يعني دورولنا على جماعة الفراعنة أمتاع التحنيط يا جماعة الخير .. لا لازم نفهموا تحنيط موميات الفراعنة المصريين أكويس, وأنتعلم كيف بنى الفراعنة مقابرهم, ومرات نحتاج لبناء الأهرامات بيش أنحطوا فيها الناس المقدسة أمتاعنا).

* ولو أردت أن تقدم صورة للقائد كفنان وليس كسياسي .. فماذا سترسم ؟

- سأرسم شط لبحـــــر الليبي ومياه البحر .. والمعارضة واللي مش عاجبة يمشي يشرب منــــــه .. (أجمل ضحكة بمقياس رختر هذه المرة .. يعني الطيور على أشكالها تقع .. والمنطق والأدب ايجبا ربي).

مع الشكر والتقدير لقناة الجزيرة لكشف هؤلاء العوالق المتمترسة بالعفونة.

فهل سنرى من ليلى الشيخلي بالتحديد لقاء مع أحد الخونة (بمقياس رختر) .. اسف مع أحد رموز المعارضة الليبية بالخارج طبعاً .. أما من هم بالداخل الليبي فهم ليسوا معارضة بل طايحين سعد وممنوع عليهم كلمة معارضة ليبية .. المستكردين بالأرض .. ولكننا نرحب نحن أيضاً بكلمة خونة إذا كنا كمن بالخارج لم ينسوا أبداً انهم ليبيون برغم كل المحن .. أجل لنكون خونة ولا نكون ذيول لهؤلاء الحقراء الجاثمين على صدر البلاد ...فهل ستحاوري يا أيها الجميلة ليلى الشيخلي أحد رموزنا الوطنية, ولنرى على الأقل الفارق بين الخاين والغير الخاين ؟
 

كتبه: بنغازي17
حركة العصيان المدني بليبيا
esslibyabz@yahoo.com