02/10/2006

حديث مع احد اموات المدينة

السلام عليكم ايها الجدود والأباء والأصدقاء يا ايها الموتى بالمقابر
 

فنحن ندعوا لكم دائما بالجنة و محو سيئتكم .. نعم فنحن نعلم ان أغلب من مات منكم مات وعنده غصة كبيرة ... غصة تلذذ بها دون ادنى شك ذاك الوجه الصدفة الذي لزال ينبش بأيامنا ويزرع كل حين مرض وفقر وغصايص وكل اهانات تسطر وبكل خبث و بكل وقاحة على وجه ليبيا العجب و لسنوات اصبحت بالأرث والحساب التاريخي طويلة وطويلة .. فالسلام عليكم: يا دار المؤمنين فانتم السابقون ونحن ألاحقون, فهل سنلحق بكم والغصة باقية ايضاً بقاء هذا الوجه الصدفة او قدرنا السيئ بكل تأكيد ؟.
 

فلعل لقائي بأحد الأموات ببنغازي هو امر حتمي بعدما اكتشفنا بليبيا ان الاحياء هم ايضاً اموات !! ومن هنا فقد كان الطريق متجهاً الى مقبرة الهواري مباشرة بكل تأكيد وتلك المقبرة العامرة بالمونى والذين بكينا عليهم كثيراً كما نبكي اليوم على من يسموا افتراضاً احياء ..والاختيار بين الموتى هو غير مهم وخاصة بالقبور التي بخلف المقبرة وليس بمقدمتها والتي بها أضرحة وكتابات عن شهداء ما .. ومن هنا فلقاء احد الموتى انفع واجدى من لقاء من هم احياء افتراضياً والذين يتوضئون ويغسلون و كل يوم ايديهم الى المرافق وحجج العار وبراهينها اصبحت عجب ومن فوقهم احاجي واحاجي من العار , فالأحياء الأفتراضيين اصبحوا قبور واضرحه تمشي على وجه الأرض ..اليس هذا عجب ؟, وعلى الأقل فتلك البهائم الحية لها تصور ما للحياة وكيفية قضم العشب والكلاء واخيراً الى المذبحة ودكاكين الجزارة التي تعلق بها اجسادها بشناقيل حديدية خصصت للحوم الخراف والابقار وليست بكل تأكيد لأجساد بشر.

(بعدما سمية باسم الله وقفزت من على صور المقبرة ..و وقفت على ذلك القبر ولم استطيع ان اقرأ اسم هذا المتوفي لشدة الظلام الدامس بتلك الليلة الحالكة السواد)
 

مرحب بك يا سيدي الميت ... رددت هذه العبارة لمرات عديدة ... ايه .. يا خويا تسمع فيا ولا لا ..كان لديا شعور غريب ان هذا المتوفي سيرد عليا لأمر لا اعرفه .. تسمع فيا ولا لا .. هييه انت يا ميت يا رحمة الله عليك .. السلام عليكم
 

(وبصوت اجش رد عليا صاحب هذا القبر فجأة)
 

الميت: مرحباً بك يا خوي كيف حالك ...
 

* مرحب بيك مرحب بيك..بسم بببسم االلله تي .. بسم الله الرحمن الرحيم ..مرحب بيك انشالله طيب..تتتتي شنو حاللللك..
 

(سمعت ضحكة خفية من هذا الميت) وردد قائلاً :
 

الميت: الحمد لله الحمد لله والشكر له .
 

* تكم لك وانت ميت يا خويا ؟
 

الميت: ... تقريباً عشرسنوات وامعاها ...
 

* (عشر سنوات يحسابهن اشوية وهو اكيد قعد ولد عم لهيكل عظمي) هل صحيح يا خويا ان عندكم عذاب قبر والملاكين والسؤال..و .. و ...؟
 

الميت: نعم وهل لديك شك بهذا ...رد بالك ان تشك بكل ما اتى الينا من ديننا الاسلامي الحنيف ..رد بالك اه .. فأول ما خرج آخر واحد بالمقبرة ومن شيعوني بالجنازة..وخيك لقا روحة بهذا القبر والفجعة طبعاً ما نبيش نحكيلك عليها.. و جوني الجماعة ..وعينك ما تشوف الا النور ( يا شينك نهار ) L..( يا شينك نهار ).
 

* بلا صار الموضوع جديات :
 

الميت: ... نعم جديات وحقيقة يا خويا .. رد بالك اتضيع دقيقة الا وتذكر بها الله سبحانه وتعالى ,, واقرأ القران ديما وصلي .. وصلي بخشوع تام ورد بالك من الحرام ...واعرف الحلال اكويس.. وادير الخير .. ورد بالك من الوالدين .. ولا تستولي على حق احد .. ولا تترك حقك لأي احد ... لكن نبي نسألك .. تي شنو صار فيكم وشنو صار لبلادنا ليبيا .. انشالله حالتكم اقعدت اكويسة و الرئيس الجديد امتاعكم شنو جوا ازعمك كيف الشينكة اللي كان يحكم ليبيا .. اكيده الرئيس الجديد ولد ابلادنا واكويس يعرف الحق ويحب لبلاد وهلها مش كيف هضك القرقاض الحقود على ليبيا وهلها ..هيـــه احكيلي ..؟
 

* شنو رئيس جديد ابلاد تغيرت .....خرف ولا خرف .. تي قاعد وجه النكد لعند توا ماد عنفكته ووجهه قدامنا كيف ابليس...واللي ايضحك من الهم ان حتى اعيالة كيف النمل بدوا يطلعوا علينا .. والطيور على اشكالها تقع ... يا سبحانه الله زريعة وحدة .. وبخلقه سئون قصدي شئون .
 

الميت: كيف قاعد ..لا لا لا مش معقولة ..بلا بلا .. انشالله مزال قاعد بلا.. بلا يا عليك ثقيل دم بلا بلا ..
عليك اللي ما ايتحشمش هض .. تي انشالله مزال متريس عليكم .. يا شينك حالة حالتكم .. وانا انقول كنها المقبرة كل يوم ايزيدوا جماعتها من الميتين ..يا راجل تحتى العويلة الصغار اقعدوا ايجونا واجد ..لا حول ولا قوة الا بالله , وانا انقول كنا اللي ايجيبوه ميت ايقول سكر ضغط .. سكر ضغط دم
 

* غير قولي شنو جو القبر ازعمك اكويس ولا ظلام وضيق ويبس ريق تي بلكي خير من هذا القبر الجماعي اللي عايشين فيه في ليبيا:
 

الميت: انت وعملك يا خويا .. انت وعملك.. (يا داير يا لاقي) الضيق واليبس الريق يعرفه جاري اللي يالايا..
 

* تكنا جارك اللي يلاك .. انشالله تعرفوا بعضكم وقالبينها هدرزة .. مش ناقصكم الا بالتوك وياهو ماسينجر اتكسدوا عليه كيف ما الدنيا واخذيناه كساد مع كساد لعند قعدنا عيت الكساد والهدرزة .. قتلي جارك اللي يلاك كنا?
 

الميت: كان امخلطها ومجلطها وهو حي .. يشتغل بالأمن وأبصاصة حرفة وعلى وذنها وعضو يا سي البي في اللجان الثورية ودكبل يا راجل شباب واجدين مظاليم في السجون بيش يرضوا عليه .. وكان سراق كبير ويحسابها دايما .. دار حادث سيارة وهو مخمور (داقها) وراح فيها ... وانا طلبت من الملك المسؤول على المقبرة ينقلني لقبر اخر .. لأن رايحته امعفنة واجد .. قالي كمل المدة امتاعك وبعدين ننقلك في مكان اكويس..كل يوم يا راجل ايجوه ويحرقوا فيه بالنار كل يوم.. ويعذبوه وهو ايعيط ..لعند فيه وليا عجوز طيبة جاراتنا في القبور قالتلهم .. خلاص يا اعويلبتي حرام عليكم .. تحساب روحها العزوز في الدنيا (نست) ردوا عليها ..قالولها ..اسسسسسسس اسسسس انت ممنوع كلام .. كلام ما فيش ... اسسسسس يالا !!! وما قريب الا راحت فيها العزيز .. لكن ادخلنا واسطة كلنا الميتين في الموضوع ومعانا شيخ جامع مبارك قديم في المقبرة ... وربك سترها.
 

* تكيف تهنا القبورة بالمدة ولا شنو ؟
 

الميت: مالا شنو ..انت وعملك ..انا مثلاً داير خير واجد في والدنيا وفي جيراني.. والحمد لله, وانصلي .. يعني حكايتي امبحبة اشوية خير من هضا جاري .. اللي لاوي عنفكته اوجهه وهو حي قدام الناس .. انا نعرفه اكويس وانا حي ونسمي فيه البصاص الكبير ... تغير قولي احكيلي على البلاد اشوية.
 

* لبلاد معش اقعدت ابلاد صدقني .. (تنهيته كبيرة) : الناس مش كيف الناس ...الفساد قعد بالبلاش ..الجوع الحقيقي ضارب الناس يمين ويسار .. شباب رايحين فيها بالجملة والمخدرات والحبوب الهلوسة بالبلاش .. وذوايح في الشوارع ميتين وهما حيين, المستشفيات حدث ولا حرج من كثرة المرضى وتونس والاردن شاهدين علينا .. وكل يوم تسمع فيه واحد منتحر .. تخيل امعايا قبر جماعي كبير وفيه سيارات وموبيلات ليبيانا .. يضحكوا على اخشوم الليبيين ديما بالزواق .. .
 

الميت: وانتم طبعاً مادين اوجوهكم وساكتين والنهار الأسود داير عليكم تحجيل .. خزيه عليكم. خزيه عليكم .. وشنوا ترجوا انشالله ؟
 

* تي ماهو حتى انتم ما سلفتوناش خير ..تي نحنا القينا وجه النكد بالصدفة القيناه قدامنا .. والذنب حتى هو ذنبكم .. مش نحنا بس.
 

الميت: تي انا سيبته والأمريكان ناويينة وقلنا اهي جاته خفيفة ظريفة. وتخيلته وهو ماد وجهه في سجن امريكي ولا ميت
 

* ميت .. اه اه .. ميت ويطير ... هههه .. باع ليبيا كلها للامريكان والانجليز .. واليهود في الطريق .. بيش يقعد على الكرسي الاغبر ... وعلى ما اعتقد يا صاحبي داير جو راهو مع ملك الموت (عزرائيل)
 

الميت: اصصصص اسكت يا راجل عيب الكلام والبصارة هذي مع خدمة كرسي العرش وتنفيذ أوامر الله سبحانه وتعالى .
 

* بالله اسألوا اللي تعرفوه من الملائكة الكويسين اينبهوا ملك الموت مرات يقعد ناسيه ولا حاجة .. تي الرؤساء اللي من جيله كلهم راحوا فيها الا هو قاعد كيف طلوز ابريكة قدام اخلقنا .
 

الميت: شكلها ليلتك سودة يا خويا .. قتلك اسكت بلا كلام فارغ ..استغفر الله العطيم ..استغفره توا ..اه .
 

* استغفر الله العظيم ..استغفر الله العظيم .. استغفر الله العظيم .. تغير قولي تعرف واحد شاب اسماه (ضيف الله الغزال) ؟:
 

الميت: الله ..الله ..الله .. نعرفه والله شاب شهيد قاعد يا اعوينة في الجنة .. اقتلوه قالوا الكلاب ... نحسابهم امتاع الحكومة الجديدة ... قالوا كاتب اكويس ايتكلم على ليبيا وهلها .. لكن ما عنديش معلومات كفاية عليه .
تغير شنوا صار في الليبيين اللي بره وامتاع المعارضة ؟
 

* هههههههههههه معارضة .. داروا مؤتمر في لندن ميه ميه وبعدين انسى لا حس لاخبر .. انشوفوا كيف اهلال العيد في شمام ومرات في فرج بو العشة ومرات حسن الامين .. وامريرة شفنا الامير محمد الرضا السنوسي .. اهو ايتكلموا وانسى !!
 

الميت: تكيف انسى ..انسى .. يعني حنك فوقاني ولا شنو ؟ ولا ليبيا انسى .. مش ابلادهم لازم يشتغلوا لعند ايذوبوا و يرجعولها وينظفوها ولا شنو .. ودم الناس والشهداء وتاريخ سيدي عمر المختار .. راح مع الريح ولا شنو؟ .. ولا انتم مش كيف الناس ... وانتم اللي جوا طبعاً ساكتين كيف القطاطيس .. بلا بلا عليك حالة ... وانا انقول قاعد لعند توا .. ويفصل طبعاً وانتم تلبسوا ... والنبي درق وجهك .. وخليني هنا في هال القبير وفوكوني من او جوهكم النكد هذي تراه ... تي عدي يا سيدي من يالايا تراه ...
 

* تغير اسمع يا راجل راك ترخيني وتعدي انا نبي اندير سبق صحفي مهم معاك.
 

الميت: سبق صحفي وذنك .. مزال غير اندير سبق صحفي مع واحد امعكرش كيفك .. والنبي الهوا برواحكم وعدوا نوضوا الناس الميتين اللي يحسابوا ارواحهم حيين تره.
 

* تغير اسمع يا راجل يا ميت بالله .. خلينا انهدرزا اشوية بلكي نقعدوا اصحاب بعد ما انموت .. واندبر في قبر سمح يلاك.
 

فلا ايجابة من هذا الميت فقد رحل عني بهذه المقبرة الصامتة فجأة .. ولكنني سأحاول لمرة اخرى بأذن الله ...
والسلام عليكم ورحمة الله وبركاته أيها الاحياء.
 

بنغازي17
ح . ع . م
esslibyabz@yahoo.com